Ishimlik suwı insan ómiri ushın oǵada áhmiyetli resurs bolıp esaplanadı. Taza, qáwipsiz ishimlik suwı densawlıq ushın paydalı, sebebi onı turaqlı paydalanıw organizmdi toksinlerden tazalap, densawlıqtı saqlawǵa járdem beredi. Al, duzlı shor suw bolsa organizmde duz jıynalıwına sebep bolıp, salamatlıǵımızǵa keri tásir kórsetiwi múmkin.

Xalıqtı tazalanǵan ishimlik suwı menen támiyinlew baǵdarında «Zamin» fondınıń Beruniy rayonı orayınan derlik 40 kilometr uzaqlıqta jaylasqan Altınsay awıl puqaralar jıyını aymaǵındaǵı 4-sanlı ulıwma orta bilim beriw mektebinde ámelge asırǵan iygilikli jumısı maqtawǵa ılayıqlı.
Bul mektepte 230 oqıwshı bilim almaqta. Fond tárepinen mektepke ornatıp berilgen ishimlik suwı filtri oqıwshılardıń salamatlıǵın bekkemlewge xızmet etetuǵınına isenemiz.
Aymaqtaǵı 25 metr tereńlikten ishiwge jaramsız shor suw shıǵıwı sebepli, ishimlik hám zárúrlik ushın paydalanılatuǵın suw uzaqtan tasıp kelingen.
– Endi tazalangan suwdan mektepke jaqın xalıq ta biypul paydalanıp, óz minnetdarshılıǵın bildirmekte. Xalqımızda suw bergen sawap degen hikmetli sózdiń mánisine itibar beretuǵın bolsaq, alıs aymaq xalqın oylap ámelge asırılǵan bul sawaplı istiń tiykarında insanlardıń búgingi kúninen razı bolıp jasawı hám salamat áwladtı tárbiyalawday maqsetke qaratılǵanı menen áhmiyetli ekenin túsinemiz, – deydi Beruniy rayonı hákimligi Málimleme xızmeti bólimi baslıǵı

A.Urazova.
Qaraqalpaqstan xabar agentligi