Tashkent qalasındaǵı «Jańa Ózbekstan» baǵında 21-mart kúni Nawrız ulıwmaxalıqlıq bayramınıń saltanatı bolıp ótti.
Dalalarda, qırlarda ózgeshe keypiyat húkim súrmekte. Janajan watanımızǵa Nawrız kirip keldi. Bul bayramdı Jańa kún, ómirimizdiń jańa beti sıpatında múnásip qádirleymiz.

Bul ulıwmaxalıqlıq bayram pútkil mámleketimiz boylap «Qádiriyatlarıń máńgi bolsın, Nawrız!» degen bas ideya tiykarında muqaddes Ramazan ayı hám «Qorshaǵan ortalıqtı qorǵaw hám «jasıl» ekonomika jılı»nda belgilenip atırǵanı ázeliy qádiriyatlarımızdı jáne kewilimiz aynasına salıp, olarǵa qayta jan baǵıshlaǵanday.
Bayram qatnasıwshıları Ózbekstan Respublikası Prezidenti Shavkat Mirziyoevti qol shapatlawlar menen kútip aldı. Mámleketimiz basshısı hámmeni Nawrız bayramı menen qutlıqladı.
– Bıyılǵı Nawrız muqaddes Ramazan ayında, onıń ullı pazıyletlerine únles halda ótip atırǵanı bayramǵa ayrıqsha ruwx, ózgeshe payız hám quwanısh baǵıshlamaqta. Kewillerimiz shadlıqqa tolǵan usınday bereketli kúnlerde elimizdiń musılmanların, pútkil islam xalqın Ramazan menen jáne bir márte qutlıqlap, barlıq pák niyetlerimizdiń qabıl bolıwın tileymiz,-dedi Shavkat Mirziyoev.
Mámleketimiz basshısı sırt ellerde ana watan mehiri hám saǵınıshı menen jasap atırǵan watanlaslarımızdı da qutlıqlap, jaqsı tileklerin bildirdi.
Nawrız 3 mıń jıllıq mámleketshiligimiz tariyxında óziniń teńsiz ruwxıy áhmiyeti menen hámiyshe ayrıqsha itibarǵa ılayıq bayram ekeni atap ótildi. Bul áyyyamnıń biytákirar gózallıǵı, adamgershilik ruwxı hám tereń filosofiyası globallasıw dáwirinde de pútkil dúnyanı tań qaldırıp atırǵanı onıń ázeliy mánisi hám ómir baǵıshlawshı kúshinen derek beredi.
Nawrızda jámlengen dóretiwshilik ruwxı Jańa Ózbekstanımızda ámelge asırılıp atırǵan úlken reformalar hám jedel ózgerislerdiń túpkilikli mazmunı hám iygilikli ideyalarına únles bolıp esaplanadı. Mámleketimizde insan qádirin ulıǵlaw, jámiyetlik ádillik principlerin bekkemlew, xalıqtıń dáramatları hám turmıs dárejesin joqarılatıw jolında isenimli qádemler qoyılmaqta.
Elimizde kóplegen zamanagóy sanaat kompleksleri, infrastruktura hám logistika tarmaqları, jańa imarat hám turaq jaylar, baqsha hám mektepler, joqarı oqıw orınları, emlewxanalar, mádeniyat hám sport dárgayları qurılmaqta. Qala hám awıllarımız, pútkil elimiz abat bolıp barmaqta.
«Jasıl mákan» ulıwma milliy joybarı sheńberinde úlkemizde jańa ekologiyalıq ortalıq jaratılmaqta. «Qorshaǵan ortalıqtı qorǵaw hám «jasıl» ekonomika jılı» mámleketlik baǵdarlaması sheńberinde bul process jáne de keń kólemge iye bolmaqta.
Prezidentimiz shıǵıp sóylegen sózinde jaslar siyasatına da toqtap ótip, olar Jańa Ózbekstannıń rawajlanǵan hám qúdiretli kúshine aylanıp atırǵanın atap ótti. Úlken nátiyjelerge erisip, elimizdiń rawajlanıwın hám abırayın arttırıp atırǵan, aqıllı, bilimli hám tájiriybeli, ǵayratlı hám isbilermen ul-qızlardı maqtadı.
– Áziz perzentlerim, sizler Watanımız aspanında jarqın juldızlar bolıp janatuǵın waqıt keldi. Elimizdegi teńsiz imkaniyatlardı ámeliy nátiyjelerge aylandırıw ushın tınımsız háreket etiń! Artıńızda derlik 38 millionlıq ullı xalıq, Prezident turǵanın hesh qashan umıtpań,-dedi Shavkat Mirziyoev.
Nawrızdıń sáni, gáshti ásirese, máhállelerde ótip atırǵan xalıq seyillerinde anıq seziledi. Milliy dástúrlerimizdiń oshaǵı bolǵan máhálle sistemasınıń turmısımızdaǵı ornı hám tásiri kún sayın artıp barmaqta. Jaslar tárbiyası, tınıshlıqtı támiyinlew, kámbaǵallıqtı qısqartıw, xalıqtı isbilermenllikke tartıw, sociallıq qorǵaw hám hayal-qızlar belsendiligin kúsheytiw, ekologiya hám abatlıq sıyaqlı bir-birinen áhmiyetli wazıypalar máhálleniń ózinde sheshilmekte.
Pursattan paydalanıp, mámleketimiz basshısı 22-mart – Máhálle sisteması xızmetkerleri kúni menen barlıq máhálle belsendilerin qızǵın qutlıqladı.
Nawrız keńpeyillik hám tatıwlıq ruwxı menen elimizdegi barlıq millet hám xalıq wákilleri ushın súyikli, túp mánisinde ulıwmaxalıqlıq bayramǵa aylanǵan. Usı mánide, Prezidentimiz pútkil xalqımızǵa múrájat etti:
– Biziń kúshimiz – awızbirshilik hám tatıwlıqta, qúdiretimiz – Watanǵa mehir hám sadıqlıqta, jetiskenligimiz – ózimizge bolǵan joqarı isenimimizde!
Ulıwma insanıylıq mánisi sebepli Nawrız Birlesken Milletler Shólkemi tárepinen xalıqaralıq bayram sıpatında tán alınǵan. Bul qádiriyat Shıǵıstaǵı kóplegen xalıqlardı, sonıń ishinde, Oraylıq Aziya xalıqların jáne de tatıwlastırmaqta. Usı aydıń aqırında áyyemgi Xojend qalasında Ózbekstan, Tájikstan hám Qırǵızstan jetekshileriniń úsh tárepleme ushırasıwı óz-ara tatıwlıq jolında jáne bir ámeliy qádem boladı.
Mámleketimiz basshısı bayramda qatnasıp atırǵan elshiler hám xalıqaralıq shólkemlerdiń wákillerin xalıqaralıq Nawrız kúni menen qutlıqlap, olardıń xalıqlarına doslıq sálemin jolladı.
Bayram úlken koncert baǵdarlaması menen dawam etti. Onda elimizdiń kórkem óner ǵayratkerlerinen tısqarı Túrkiya, Túrkmenstan, Ázerbayjan, Qazaqstan, Qırǵızstan, Tájikstan sıyaqlı tuwısqan úlkelerdiń belgili qosıqshıları da qatnasqanı dıqqatqa ılayıq boldı.
«Jańa Ózbekstan» baǵı bayram keypiyatına bólengen. Maydanshalar álwan gúller hám bayraqlar menen bezelgen. Milliy mádeniyat oraylarınıń kórgizbelerinde elimizdegi tatıwlıq hám bay mádeniy hár túrlilik kózge taslandı.
Mámleketimiz basshısı bul kórgizbelerdi hám folklor-etnografiyalıq jámáátlerdiń nama-qosıqların tamashaladı.
Nawrız seyilleri elimizdiń barlıq orınlarında dawam etpekte. Diyqanlar xalqımızdıń ırısqı-nesiybesi retinde jerge bereket tuqımların ekpekte. Máhállelerde abadanshılıq, miyrim-shápáát ilajları ótkerilmekte.

Ziyodulla JONIBEKOV,
ÓzA