Ámiwdárya rayonında shigit egisiniń baslanıwına baǵıshlanǵan kórgizbeli seminar ótkerildi.

Kórgizbeli seminarda tarawǵa juwapker shólkemler, paxta klasterleri kárxanaları, fermer xojalıqları basshıları menen qánigeler qatnastı.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, húrmetli Prezidentimiz tárepinen tarawǵa qaratılıp atırǵan itibar, berilgen imkaniyatlar haqqında keń túrde atap ótti. Sonı aytıp ótiw kerek, Ózbekstan Respublikası Prezidentiniń ayrıqsha itibarınıń nátiyjesinde Qaraqalpaqstan ushın bir qatar arnawlı párman hám qararlar qabıllanıp, sol tiykarda jańa imkaniyatlar hám jeńillikler jaratılmaqta. Ótken qısqa dáwir ishinde, usınday jeńillikler tiykarında úlkemizge awıl xojalıǵı ushın zárúrli kóplegen texnika hám agregatlar alıp kelinip, bul óz gezeginde tarawdıń rawajlanıwında áhmiyetli orın tutpaqta.
Ótkerilgen ilajda áne usınday imkaniyatlar atap ótilip, sózge shıqqanlar tárepinen egis mapazın qısqa múddetlerde sapalı juwmaqlawdıń nátiyjeli usılları, diyqan fermerlerimiz itibar qaratıwı kerek bolǵan áhmiyetli máseleler boyınsha pikir-usınıslar bildirildi.
Ilajda nuraniy aqsaqallardıń duwası menen atızlarǵa dáslepki shigitler sebildi.
Sonı aytıp ótiwimiz kerek, bıyıl respublikamiz boyınsha 100 mıń gektar maydanǵa shigit egiliwi rejelestirilgen bolıp, mapazdı shólkemleskenlik penen ótkeriw maqsetinde, aymaqlarda 243 otryad shólkemlestirilip, olarǵa 15 mıńnan aslam texnika hám agregatlar biriktirilgen. Sonıń ishinde, 170 joqarı ónimdarlı zamanagóy seyalkalar jumıs júrgizedi.

Qaraqalpaqstan xabar agentligi