Ózlestiriw kórsetkishine qarap studentlerge grantlardı qayta bólistiriw tártibi tastıyıqlandı. Bul haqqında Húkimettiń Joqarı bilimlendiriw shólkemlerinde studentlerge grantlardı beriw hám qayta bólistiriw tártibi haqqındaǵı rejesinde sóz boladı.

Hújjetke bola, tálim grantına talabanlardan usı oqıw jılında ózlestiriw kórsetkishi boyınsha GPA kórsetkishi 3,5 hám onnan joqarı bolıwı talap etiledi. Ózlestiriwi usı kórsetkishten tómen bolǵan studentlerdiń tálim grantın differenciyalasqan túrde qayta bólistiriwde qatnasıwına ruqsat etilmeydi hám tálim grantı ornı vakant qaladı.
Tálim grantına talabanlar ushın joqarı bilimlendiriw shólkeminiń rásmiy veb-saytında onlayn dizimnen ótiw hám erisken jetiskenliklerin tiykarlawshı hújjetlerdi júklew imkaniyatı jaratıladı.
Tálim grantına talabanlardıń jámiyetlik belsendilik kórsetkishi 20 ballı ólshemde bahalanadı, onda bahalaw normasına tiykarlanıp esaplanǵan nátiyjeni «5» sanına bóliw arqalı anıqlanadı.
Belgilengen tálim grantı orınları sheńberinde tańlaw shegarasında birdey nátiyje kórsetken talabanlardıń akademiyalıq ózlestiriw kórsetkishine ústinlik beriledi. Eger ózlestiriw kórsetkishinde de birdey nátiyje anıqlanǵan jaǵdayda usı talabanlar ushın ózlestirilgen semestrlerde ótilgen qánigelik pánlerinen test sınaqları ótkeriledi.
Joqarı bilimlendiriw shólkemi keńesiniń qararına tiykarlanıp tálim grantın alıwshı studentler dizimi hár jılı 25-avgustqa shekem joqarı bilimlendiriw shólkeminiń rásmiy veb-saytında járiyalanadı.

Qaraqalpaqstan xabar agentligi