Oliy Majlis Senatı kengashi gezektegi májilisi bolıp ótti. Senat Baslıǵı Tanzila Norboeva alıp barǵan májiliste atap ótilgenindey, jalpı májilis videokonferencbaylanıs sistemasınan paydalanǵan halda ótkeriledi. Onda bir qatar máselelerdi dodalaw názerde tutılǵan.

Májiliste Ózbekstan Respublikası Prezidenti Shavkat Mirziyoev tárepinen Korrupciyaǵa qarsı gúresiw milliy keńesi májilisinde belgilep berilgen baslı baǵdarlardan kelip shıǵıp, Senat hám xalıq deputatları jergilikli keńesleri aldında turǵan wazıypalar kórip shıǵıladı.
Sonday-aq, Suw kodeksin tastıyıqlaw, awıl xojalıǵı táwekelshiliklerin qamsızlandırıw, kreditorlardıń girew menen támiyinlengen talapların qanaatlandırıw sistemasın jáne de jetilistiriwge baylanıslı áhmiyetli nızamlar dodalanadı.
Senatorlar tárepinen zergerlik sanaatın jáne de rawajlandırıw hám jollarda háreketleniw qáwipsizligin támiyinlewge hám jámiyetlik transporttan paydalanıw nátiyjeliligin arttırıwǵa qaratılǵan nızamlar da kórip shıǵıladı.
Bunnan tısqarı, jalpı májiliste sudlar jumısınıń hám puqaralar huqıqları menen erkinlikleriniń kepilliklerin kúsheytiwge, qamaqqa alınǵanlarǵa qıynaw jaǵdaylarınıń aldın alıwǵa qaratılǵan nızamlardı da dodalaw rejelestirilmekte. Jalpı májilis kún tártibi sheńberinde Oliy Majlis Insan huqıqları boyınsha wákil (Ombudsman)diń, Bala huqıqları boyınsha wákili (Balalar ombudsmanı)niń 2024-jıldaǵı jumısı boyınsha esabatların tıńlaw rejelestirilgen.
Sonday-aq, bir qatar xalıqaralıq shártnamalardı ratifikaciyalaw, ózin-ózi bánt etiw tártibinde miynet etiwdi ámelge asırıwdıń ayırım máseleleri boyınsha húkimetke jiberilgen parlament sorawınıń nátiyjeleri haqqındaǵı máseleler de májilis kún tártibinen orın alǵan.
Jalpı májiliste kóriletuǵın máseleler mámleketimizde alıp barılıp atırǵan reformalardıń bas ólshemi – insan qádiri hám mámleketimizde insan huqıqları menen erkinliklerin kepillikli támiyinlew baǵdarında ámelge asırılıp atırǵan jumıslardıń huqıqıy-normativlik tiykarların jáne de bekkemlewge xızmet etedi.
Májiliste Senattıń besinshi jalpı májilisin 2025-jıl 17-mart kúni shaqırıw haqqında qarar qabıl etildi.

N.Abduraimova, ÓzA