Búgin elimizde júzden aslam hár qıylı millet wákilleri óz-ara awızbirshilikte tınısh-tatıw, abadan turmısta jasamaqta. Házirgi waqıtta respublikamızda rus, ukrain, qazaq, túrkmen hám koreys milliy-mádeniy orayları óz jumısların alıp barmaqta.

Bizler 13-mart-qazaq xalqınıń «Kórisiw-amal merekesi» kúni múnásibeti menen Qaraqalpaqstan-qazaq milliy mádeniy orayında bolıp, oray baslıǵı Asqar Úmbetaevtı bayram menen qutlıqladıq.
Kóp milletli Qaraqalpaqstan aymaǵında házirgi waqıtta 300 mıńǵa shamalas qazaqlar bolıp, olar usı úlkede jasawshı basqa xalıqlar menen bir atanıń balalarınday tınısh-tatıw turmıs keshirmekte. Olardıń perzentleriniń óz ana tilinde bilim alıwı ushın respublikamız paytaxtı Nókis qalası hám qazaq xalqı kóp jıynalǵan Qońırat, Xojeli, Taqıyatas, Beruniy, Taxtakópir, Qaraózek, Shomanay hám Moynaq rayonlarında 150 den aslam mekteplerde qazaq tilinde bilim beriwshi klasslar shólkemlestirilgen.
Usı mekteplerde balalarǵa sabaq beriw ushın Ájiniyaz atındaǵı Nókis mámleketlik pedagogikalıq institutında jeti qánigelik boyınsha, Berdaq atındaǵı Qaraqalpaq mámleketlik universitetinde bir qánigelik boyınsha pedagog kadrlar tayarlanbaqta.
Ózbekstan Respublikası Prezidentiniń qararı hám Qaraqalpaqstan Respublikası Joqarǵı Keńesiniń qollap-quwatlawı menen elimizdegi basqa millet wákilleri sıyaqlı, qazaq xalqınıń tili, mádeniyatı, milliy úrp-ádet hám salt-dástúrlerin saqlap, olardı keleshek áwladlarǵa jetkeriw boyınsha kóplegen unamlı jumıslar ámelge asırılmaqta.
Mine, usınday milliy bayramlarımızdan biri 13-mart qazaq xalqınıń «Kórisiw kúni» bayramı bolıp tabıladı. Bul bayram ázelden milletler aralıq tatıwlıq, jaslardı óz-ara doslıq, keńpeyillik ruwxta tárbiyalaw, kem támiyinlengen shańaraqlardı ruwxıy hám materiallıq jaqtan qollap-quwatlaw qádiriyatların ózine qamtıp alǵan bayram desek boladı. Sebebi, usı kúni ata-babalarımız qıstan aman-esen shıqqanına quwanıp, usı sánede barlıq awıl-aymaq bas qosıp bul merekeni bayramlaǵan. Sol kúni awıl biyleri ayırım sebepler menen óz-ara ókpelesip, qatnaspay júrgen jaqın-juwıq, aǵayin-tuwǵan, qońsı-qobalardı ortaǵa alıp, «Mine qısqı toqsan shıǵıp, jańa máwsim kirip keldi. Taǵı bir jılımız artta qaldı, endi kirip kiyatırǵan jańa jılǵa taza kewil menen jaqsı niyetler etip, ókpe-giynesiz óteyik, biri-birińizdi keshirińler dep olardı qushaqlastırıp kóristirgen hám óz-ara jarastırıp jibergen.
Mine, sonlıqtan usı kúni qazaq xalqı bir-biri menen qushaq ashıp kórisip, elge kirip kelgen jańa jıl menen bir-birin qutlıqlaydı. Jaqsı tilekler aytıp, ótken jıldan qalǵan ókpe-giyne, qapashılıqlardı umıtıp, bul kúndi bayram sıpatında keń túrde bayramlaydı.
Pursattan paydalanıp, barlıq respublikamız xalqın 13-mart-qazaq xalqınıń Amal-kórisiw kúni merekesi hám jaqınlap qalǵan ulıstıń ullı kúni esaplanǵan Nawrız bayramı menen qızǵın qutlıqlayman. Ilayım aspanımız ashıq, elimiz tınısh bolıp, xalqımız óz-ara tatıwlıqta turmıs keshire bersin.

Adilbay Orazov,
Qaraqalpaqstan xabar agentligi sholıwshısı.