Aldın xabar bergenimizdey, usı kúnlerde Qaraqalpaqstanda bolıp turǵan Ózbekstan Respublikası Suw xojalıǵı ministri Sh.Xamraev rayonlarda suw xojalıǵı tarawında, sonday-aq, “Kámbaǵallıqtan abadanlıqqa qaray” baǵdarlaması sheńberinde ámelge asırılıp atırǵan jumıslar menen tanıspaqta,-dep xabar bermekte Suw xojalıǵı ministrliginiń baspasóz xızmeti.

Búgin ministr Qońırat rayonında bolıp, dáslep Prezidentimizdiń tiyisli qararı tiykarında rekonstrukciyalanıp atırǵan “Jinishke” kanalınıń betonlanıp atırǵan bólegin barıp kórdi hám betonlaw jumısların jedellestiriw boyınsha tapsırmalar berildi.
Qońırat rayonı orayınan aǵıp ótiwshi “Jinishke” kanalınıń 2,5 kilometrlik bóleginde betonlaw jumısların alıp barıw rejelestirilgen. Búgingi kúnde “Qubla Bunyodkor Janubiy” JShJ qurılıs kárxanası tárepinen betonlaw jumısları alıp barılmaqta. Bul kanalda rekonstrukciyalaw jumısları juwmaqlanǵannan soń, rayon orayındaǵı máhálleler, Órnek hám Ádebiyat awıl puqaralar jıyınları aymaqlarınıń suw támiynatı jaqsılanadı.
Suw xojalıǵı ministri qurılıs kárxanasınıń juwapkerlerine qosımsha texnika hám jumısshı kúshin tartıp, betonlaw jumısların jedellestiriw boyınsha tapsırma berdi. Erteńnen baslap jumısshılardı 100 ge jetkeriw, Nawrız bayramına shekem kanaldıń 1,5 kilometrlik bólegin betonlawdı juwmaqlaw boyınsha wazıypalar belgilendi.
Usı jerde Qońırat rayonı hákimi B.Madaminov penen ushırasıp, rayonda irrigaciya tarmaqların betonlaw, “Kámbaǵallıqtan abadanlıqqa qaray” baǵdarlaması sheńberinde xalıqtıń qıytaq jerlerine suw jetkeriw baǵdarındaǵı jumıslardıń barısı hám aldaǵı wazıypalardı dodaladı.
Rayon hákimi hám aymaqtaǵı suw xojalıǵı juwapkerleri menen birgelikte Xorezm hám Órnek awıllarındaǵı ishki kanal hám salmalardı betonlaw boyınsha ámelge asırılıp atırǵan jumıslar menen de tanıstı. Ishki kanal hám salmalardı betonlaw baǵdarındaǵı ilajlardı jedellestiriw boyınsha kórsetpeler berildi.

Qaraqalpaqstan xabar agentligi.