Mámleketimizde «Milliy irrigaciya sistemasın jetilistiriw hám energiya nátiyjeliligin arttırıw joybarı islep shıǵılmaqta. Onıń ulıwma bahası 240,5 mln.dollar bolıp, sonnan Jáhán bankiniń úlesi 200 mln.dollardı quradı.

Joybar 2025-2030-jılları Qaraqalpaqstan Respublikası, Namangan, Qashqadárya, Surxandárya hám Buxara wálayatlarında ámelge asırıladı. Bul aymaqlarda 8 kanaldı rekonstrukciyalaw názerde tutılǵan. Onıń nátiyjesinde 232 mıń gektar suwǵarılatuǵın egislik maydanlarına suw jetkerip beriw jaqsılanadı.
Jáhán bankiniń Aymaqlıq direktorı Sameh Vahba basshılıǵındaǵı bank qánigeleri Ózbekstan Suw xojalıǵı ministrliginde bolıp, bul joybar sheńberinde sóylesiw alıp bardı.
Sóylesiw waqtında Suw xojalıǵı ministri Shavkat Hamraev mámleketimiz basshısınıń baslaması menen tarawda alıp barılıp atırǵan reformalarǵa toqtap ótti. Kanallardı betonlaw, nasos stanciyaların modernizaciyalaw, suwdı únemlewshi texnologiyalardı engiziw, tarawdı sanlastırıw, mámleketlik-jeke menshik sheriklikti rawajlandırıw sıyaqlı faktorlar esabınan jılına 10 mlrd.sum átirapında suwdı únemlew názerde tutılǵanı haqqında aytıp ótti.
Ushırasıwda joybardıń texnikalıq-ekonomikalıq tiykarların tastıyıqlaw, Jáhán banki hám Ózbekstan Respublikası Suw xojalıǵı ministrligi arasında investiciyalıq birge islesiwdi jańa basqıshqa alıp shıǵıwǵa baylanıslı máseleler dodalandı.

Qaraqalpaqstan xabar agentligi