Xalqımızda bir maqal bar: Qońsıń tınısh – sen tınısh. Bul sheksiz haqıyqat, ásirese, keskin kelispewshilik hám zorlıq-zombılıq kóbeyip, túrli regionlardı ózine tartıp atırǵan, ásirler dawamında óz-ara tınısh, awızbirshilikli jasaǵan pútkil xalıqlar bir-birine qarama-qarsı bolıp qalıp atırǵan búgingi kúnde oǵada úlken áhmiyetke iye.
Ózbek hám awǵan xalıqları burınnan – qońsılas jasap keledi. Bizdi ulıwma mádeniy, ruwxıy hám tariyxıy qádiriyatlar, birden-bir din, ullı ata-babalarımızdıń miyrası birlestirip turadı.
Ózbekstan bárqulla Awǵanstandaǵı jaǵdaydı turaqlastırıw, bul mámleket penen jaqsı qońsıshılıq qatnasıqların jolǵa qoyıw hám bekkemlew tárepdarı bolıp kelgen. Ásirese, sońǵı jıllarda qatnasıqlarımızda ózgeshe qatnas payda bolıp atırǵanı, birge islesiw jańasha kózqaraslar tiykarında rawajlanıp atırǵanı xalıqaralıq kólemde tán alınbaqta.
Mámleketimiz Birlesken Milletler Shólkemi minberinen, bir qatar xalıqaralıq hám regionnalıq strutkuralar sheńberinde Awǵanstanǵa baylanıslı perspektivalı usınıs, baslamalar alǵa qoyıp atırǵanı belgili. Eń áhmiyetlisi, bul turmıslıq joybarlardıń barlıǵı ámeliyatqa engizilmekte.
Usı kúnlerde Awǵanstan Bas ministri orınbasarınıń wazıypasın atqarıwshı Mullo Abdul Ǵani Barodar basshılıǵındaǵı delegaciya mámleketimizde bolıp turıptı.
22-fevral kúni mártebeli miymanlardı Bas ministrdiń orınbasarı Jamshid Xwjaev, Prezidenttiń Awǵanstan boyınsha arnawlı wákili Ismatulla Еrgashev, Talibannıń elimizdegi elshisi shayx Abdulǵaffor Bahr kútip aldı.
Delegaciya quramında házirgi waqıtta Waqıtsha húkimet quramında kán hám neft, transport hám aviaciya, sanaat hám sawda, awıl xojalıǵı sıyaqlı tiykarǵı tarawlarda ministrdiń wazıypasın atqarıp atırǵan, sonday-aq, Qarjı ministrligi basshısınıń dáramat hám bajı isleri boyınsha orınbasarı sıyaqlı ekonomikanıń eń áhmiyetli tarmaqlarınıń juwapker wákilleriniń barlıǵı bul sapardan bir qansha joqarı maqsetler gózlengeninen derek beredi.
Mullo Abdul Ǵani Barodar dáslep húkimetimiz basshısınıń orınbasarı Jamshid Xwjaev penen ushırasıp, sawda hám tranzit qatnasıǵın bekkemlew, birgeliktegi sawda zonaların shólkemlestiriw máselesin dodaladı.
Joqarı mártebeli hámeldar Awǵanstan hám Ózbekstandı diniy, tariyxıy, mádeniy hám etnikalıq birlik baylanıstırıp turatuǵının jáne bir márte eske alıp, bul jaǵı eki úlkeniń siyasiy, ekonomikalıq qatnasıqlarına tereń unamlı tásir kórsetip atırǵanın atap ótti. Sonıń menen birge, Transawǵan joybarı, 500 killovattlıq elektr jetkerip beriw sistemasın jaratılıwı haqqında atap ótti. Óz-ara sawdada milliy valyutalardan paydalanıw, uglevodorod hám mineral resurslar boyınsha kelisimdi ámelge asırıw, ózbekstanlı isbilermenlerdiń Awǵanstanda túrli tarwlarǵa investiciya kirgiziw imkaniyatın úyreniw usınısın alǵa qoydı. Investorlarǵa zárúr qolaylıqlar jaratıw máselesi hár tárepleme qollap-quwatlanatuǵının bildirdi.
Óz gezeginde J.Xwjaev ózbek isbilermenleri bul tuwısqan mámlekette neft hám gazdi izlew hám qazıp alıw arqalı sanaattı rawajlandırıw, máselen Namangan wálayatında cement zavodın qurıw ushın investiciya kirgiziwge tayar ekenligin málim etti. Málim bolıwınsha, «Toti Maydon» gaz kánin izlew procesinde álle qashan sezilerli nátiyjege erisilgen, tez arada qazıw jumısları baslanadı.
– Maqsetimiz – siyasiy, ekonomikalıq, tranzit hám sawda qatnasıqların keńeytip, Awǵanstanǵa Ózbekstan investiciyasın tartıw ushın imkaniyat jaratıw, – deydi Taliban baspasóz xızmetiniń wákili Hamidullo Fitrat. Ulıwma, eki mámlekettiń rásmiyleri kóplegen tarawlar boyınsha sheriklikti dodaladı.
Awǵanstanlı ekonomikalıq tallawshı Ahmad Firdavs Behǵozinniń pikirinshe, qońsılar hám basqa mámleketler menen bekkem qatnasıq tikleniwi mámlekettiń ekonomikalıq potencialın sezilerli dárejede arttıradı.
– Birge islesiwshi eller menen ekonomikalıq almasıw kólemi qanshelli keńeyse, ishki ekonomikamız dúnya bazarına sonsha tez integraciyalasadı, – dedi ol.
Usı kúnniń ózinde Ózbekstan Bas ministri Abdulla Aripov Awǵanstan Bas ministri orınbasarınıń wazıypasın atqarıwshı Mullo Abdul Ǵani Barodar menen eki tárepleme sóylesiw ótkerdi.
Ministrler Kabineti baspasóz xızmetiniń xabarına bola, sóylesiw dawamında mámleketlerimiz hám xalıqlarımız arasındaǵı qatnasıq doslıq, birge islesiw hám jaqsı qońsıshılıq principine tiykarlanǵanı, Prezident Shavkat Mirziyoev Awǵanstan menen barlıq tarawlarda konstruktivlik hám óz-ara paydalı qatnasıqlardı rawajlandırıwǵa ayrıqsha itibar qaratıp atırǵanı atap ótildi. Sheriklikti jáne de keńeytiw, sawda, ekonomika, energetika, transport hám basqa tarawlarda izbe-iz rawajlandırıw boyınsha hár tárepleme pikir alısıldı.
Sóylesiwler, keń kólemli pikir alısıw qońsı mámlekettiń tınısh hám turaqlı rawajlanıwı, bárinen burın, region mámleketleri menen birge dúnya jámiyetshiligine hár tárepleme integraciyalasıwı ushın zárúr shárt ekenin jáne bir márte tastıyıqladı.
Ótken jıldıń avgust ayında Bas ministr A.Aripov Awǵanstanǵa barǵanın maǵlıwmat ornında atap ótiw zárúr.
Awǵanstan delegaciyası mámleketimizge saparı sheńberinde Tashkent qalasındaǵı bir qatar óndiris kárxanalarınıń jumısı menen jaqınnan tanısadı.
Bir sóz benen aytqanda, usı sapar dawamında erisilejaq kelisimler eki tárepleme qatnasıqtı ámeliy mazmun menen bayıtıp, eki dos mámlekettiń óz-ara paydalı hám uzaq múddetli birge islesiwin sapa jaǵınan jańa basqıshqa alıp shıǵatuǵınına gúman joq.
Ulıwma, jaqsı qońsıshılıqtı bekkemlew Awǵanstan hám barlıq końsı mámleketler, sonıń ishinde, Ózbekstannıń mápine tolıq sáykes keledi.

Wtkir Alimov, ÓzA