Prezidentimiz Shavkat Mirziyoevtiń basshılıǵında mámleketimizde Olimpiada hám Paralimpiya háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajları boyınsha ótkerilgen májiliste beligilep wazıypalardıń orınlanıwı boyınsha Ózbekstan velosiped sportı federaciyası baslıǵınıń birinshi orınbasarı Kozim Wrinbayxojaev Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Qaraqalpaqstan Respublikası sport ministri Adilbek Allanazarov, Federaciyanıń Qaraqalpaqstan aymaqlıq bólimi baslıǵı Nurullan Erlepesovar menen ushırastı.

Ushırasıwda Los-Andjeles-2028 Olimpiada hám Paralimpiya oyınlarına tayarlıq kóriwin támiyinlew maqsetinde «Jol kartası»nda belgilengen wazıypalardı muwapıqlastırıw, sonıń ishinde, sportshılardı selekciyalaw hám tańlap alıw ushın respubikamızda velosport bólimlerin 10 ǵa jetkeriw, Nókis qalasında velosporttıń «BMX Racing» túrine mólsherlengen velodrom qurıw, Kegeyli rayonındaǵı sport mektebi hám usı rayondaǵı 9-sanlı ulıwma orta bilim beriw mektebin úlgi sıpatında velosportqa qánigelestiriw, Ózbekstan velosiped sportı federaciyası Qaraqalpaqstan bóliminiń materiallıq-texnikalıq bazasın bekkemlew sıyaqlı máseleler dodalanıp, onıń orınlanıwın támiyinlew boyınsha juwapkerler hám orınlanıw múddeti belgilep alındı.
Bunnan soń jumısshı topar aǵzaları Kegeyli, Bozataw, Moynaq rayonları hám Nókis qalasındaǵı sport mekteplerindegi velosport bólimleriniń jumısların úyrendi.
Sonday-aq, Federaciya basshıları Kegeyli rayonında ótkerilgen shosse boyınsha Qaraqalpaqstan chempionatına qatnasıp, jarıs jeńimpazlarına diplom hám estelik sawǵalar tapsırıldı.

Qaraqalpaqstan xabar agentligi