«Uz-Kor Gas Chemical» JShJ QK Ústirt gaz-ximiya kompleksinde, “Mámleketlik áhmiyetke iye bolǵan obyektlerde ayrıqsha jaǵdaylardıń aldın alıw hám órtler profilaktikası jumıslarınıń nátiyjeliligin arttırıwda birgeliktegi háreketler” atamasında oqıw-seminarı ótkerildi.
Maqset – Qaraqalpaqstan Respublikası aymaǵındaǵı ayrıqsha áhmiyetke iye hám kategoriyalanǵan obyektlerde órt qáwipsizligin támiyinlewdi shólkemlestiriw bólimsheleriniń basshı hám inspektorlar quramınıń óz-ara tájiriybe almasıwın támiyinlew bolıp esaplanadı.
Oqıw seminarında qatnasıwshılar «Uz-Kor Gas Chemical» JShJ QK Ústirt gaz-ximiya kompleksiniń cexları hám uchastkalarına ornatılǵan zamanagóy avtomat órt óshiriw hám órtten xabar beriw qurılmaları jáne usı obyektte shólkemlestirilgen 24-órt-qutqarıw bólimindegi tiykarǵı hám arnawlı texnikalar, ásbap-úskeneler hám jeke quramǵa jaratılǵan sharayatlar menen jaqınnan tanıstırıldı.
– Sonday-aq, seminarda obyektte shólkemlestirilgen arnawlı xızmetlerdiń kúsh hám quralların tartqan halda órt óshiriw ámeliy-taktikalıq oqıw shınıǵıwı ótkerildi. Atap aytqanda, jábirlengenlerdi waqıya ornınan alıp shıǵıp birinshi medicinalıq járdem kórsetiw, shártli túrde júz bergen órtlerdi óshiriw hám basqa da rejede kórsetigen shınıǵıwlar ámelge asırılıp kónlikpeler arttırıldı,-deydi JShJ profilaktika hám qadaǵalaw inspektorı leytenant Aydos Xudaynazarov.
Ilajda qatnasıwshılardıń ayrıqsha jaǵdaylardıń aldın alıw hám órtler profilaktikası boyınsha pikir-usınısları tıńlanıp, olar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.