Taylandtıń Bangkok qalasında 10-15-fevral kúnleri sporttıń Jiu-Jitsu túrinen Aziya chempionatı bolıp ótti.
Jarısqa Ózbekstan saylandı komandası quramında qaraqalpaqstanlı sportshılar da tabıslı qatnastı. Atap aytqanda, 16 jastaǵı jas óspirimler arasında ótkerilgen bellesiwlerde Allayar Baxbergenov -48 kg salmaq kategoriyasında barlıq qarsılasların jeńip shıǵıp, Aziya chempionı ataǵına miyasar boldı.
Al, 14 jastaǵı sportshılar arasında bolsa, Kamola Ǵulamova 36 kg salmaqta nevaza hám fighting túrleri boyınsha bellesiwlerge qatnasıp, eki qola medalın qolǵa kirgizdi.
Jas sportshılarımızdı bul jarısqa trenerlerden N.Kaipov, B.Úbbiev, R.Baltabaev, R.Júzbaevlar tayarladı.
-Shákirtlerimniń erisken tabısınan oǵada quwanıshlıman,-deydi Shımbay rayonındaǵı sport mektebiniń treneri Baymurat Úbbiev.-Aldaǵı waqıtları da shınıǵıwlarımızdı dawam etip, jáhán chempionatlarında da jeńimpazlıqtı qolǵa kirgiziwge háreket etemiz.

Adilbay Orazov,
Qaraqalpaqstan xabar agentligi sholıwshısı