Awǵanstanda áskeriy háreketlerdiń toqtatılǵanlıǵına 36 jıl toldı. Usı múnásibet penen orınlarda ilajlar bolıp ótpekte.
Beruniy rayonındaǵı 56-ulıwma orta bilim beriw mektebinde Awǵanstanda áskeriy háreketlerde qatnasqan urıs veteranları menen ushırasıw bolıp ótti, – deydi Beruniy rayonı hákimligi málimleme xızmeti bólimi baslıǵı A.Urazova.
Ushırasıwda Shaqırıqqa shekem baslanǵısh tálim páni muǵallimi, internacional jawınger, rezervtegi leytenant I.Bekchanov alıp bardı.
Onda Awǵan urısı veteranları M.Qoraev, X.Yangiboev, J.Jumanov hám Qurallı kúshler veteranı, podpolkovnik B.Utegenovlar qatnastı. Olar oqıwshılarǵa ózleriniń ómiri hám jumısı haqqında aytıp berdi. Tariyxqa aylanıp atırǵan hár bir kúnimizden juwmaq shıǵarıw, tınıshlıqtıń qádirine jetiw temalarında sáwbetlesiwler bolıp ótti.
Ilaj jaslardı watansúyiwshilik ruwxında tárbiyalaw, watanǵa muxabbat hám sadıqlıqtı jáne de arttırıw maqsetinde ótkerildi.
Soń veteranlar menen mekteptiń belsendi jasları birgelikte birge xızmet etken qatarlaslarınıń úylerine barıp, olardan xabar alındı.

Qaraqalpaqstan xabar agentligi