Búgingi kúnde aymaqlardaǵı kóp kvartiralı turaq jaylar hám jeke tártiptegi turaq jaylardı ısıtıwda tábiyǵıy hám suyıltırılǵan gaz, qattı janılǵı yamasa neft ónimlerinen paydalanıwda qáwipsizlik qaǵıydalarına ámel etpew jaǵdayları ushıraspaqta. Aqıbetinde puqaralardıń shańaraqlarında órt kelip shıǵıwı yamasa záhárli gaz iysinen záhárleniw jaǵdayları júz berip, insanlardıń ómiri hám densawlıǵına úlken zıyan jetkerilmekte.
Maǵlıwmatlarǵa qaraǵanda, 2024-jıldıń yanvar-dekabr aylarında aymaqlarda záhárli gaz iyisinen 91 puqara qaytıs bolǵanı, 43 i záhárlengeni hám 15 i jaraqatlanǵanı málim boldı. Bunday jaǵdaylar usı jılı da ushıraspaqta.
Záhárli gaz iysinen záhárleniwdiń aldın alıw ushın ısıtıw sistemaların turaqlı tekserip, ońlap barıw, alternativ sheshimlerden paydalanıw, záhárli gaz iysiniń qáwipliligi hám onnan saqlanıw boyınsha xalıq arasında úgit-násiyat jumısların jáne de keńnen alıp barıw maqsetinde Ózbekstan Liberal-demokratiyalıq partiyasınıń baslaması menen “Insan ómiri – biybaha baylıq, ol hámme nárseden ústin” principi tiykarında usı jıldıń yanvar-mart aylarında “Abaylı bolıń – záhárli gaz iysi” akciyasın ótkeriw rejelestirilgen.
Soǵan tiykarlanıp, ÓzLiDeP juwapker shólkemler, partiya belsendileri, jergilikli keńes deputatları hám qáwenderler menen birgelikte “Sociallıq qorǵawdıń birden-bir reestri”ne kirgizilgen puqaralardıń shańaraqlarına záhárli gaz iysin anıqlaytuǵın úskenelerdi biyǵárez ornatıp bermekte.
Akciya sheńberindegi gezektegi ilaj Nókis qalası, “Allaniyaz Qaharman,” “Jas áwlad” hám “Qumbız awıl” máhállelerinde bolıp ótti.
Ilajda xalıqtıń úylerinde ısıtıw sistemaların turaqlı tekseriw hám ońlap barıw, qáwipsizlik qaǵıydalarına qatań ámel etiw, záhárli gaz iysiniń qáwipliligi hám onnan saqlanıw boyınsha qánigeler tárepinen hár tárepleme túsinikler berildi.
Sol kúnniń ózinde máhálledegi kem támiyinlengen, sociallıq járdemge mútáj shańaraqlardıń úylerine partiya baslaması hám biyǵárez járdem sıpatında záhárli gaz iysin anıqlaytuǵın úskeneler ornatıp berildi. Ilajda záhár gaz iysi shıqqan jaǵdayda eskertiwshi úskenelerdi ornatıw, bul úskeneniń abzallıqları, onnan paydalanıw qaǵıydaları túsindirildi.
Partiyanıń bul baslamasın xalıq wákilleri úlken quwanısh penen qabıl etpekte, ózleriniń minnetdarshılıǵın bildirip ótpekte.
Bul akciya sheńberindegi ilajlar respublika boylap sistemalı túrde shólkemlestirilip barılmaqta.

Qaraqalpaqstan xabar agentligi