Prezident Shavkat Mirziyoevtiń basshılıǵında 7-fevral kúni aymaqlarda xızmet kórsetiw tarawların rawajlandırıw máseleleri boyınsha videoselektor májilisi ótkerildi.

Úsh jıl burın bul baǵdarda úlken baǵdarlama islengeni búgin óziniń nátiyjesin bermekte. Servis tarawında qosımsha 1,5 million xalıq turaqlı dáramatqa iye boldı. Xızmetler muǵdarı 2028-jılǵı 19 milliard dollardan 65 milliard dollarǵa arttı. Ásirese, málimleme texnologiyaları, qarjı xızmetleri, turizm, aviaciya, bilimlendiriw hám medicina tarawlarında «úlken sekiriw» boldı.
Bular, jaqsı, álbette. Biraq imkaniyatlar bunnan júdá kóp. Olardı turmısqa engiziwde aymaqlarda hám tarawlarda bir tutaslıq joq.
Máselen, Xorezmge 6 million turist tartıw rejelestirilgen. Biraq bul ushın samolyot hám poezdlardıń qatnawı jetkilikli emes. Medicina, aviaciya hám energetikada jeke sektor qatnasıwındaǵı joybarlar 20 milliard dollardan asqan. Biraq ishimlik suwı, kanalizaciya hám jol qurılısında bunday joybarlar derlik joq.
Májiliste usınday mashqalalar talqılanıp, aymaqlarda hám tarawlardaǵı úlken imkaniyatlar kórsetip ótildi.
Keyingi jeti jılda xalıqtıń dáramatı hám tólew qábileti 2 esege artqanı atap ótildi. Bul ushın ministrler hám hákimler xızmet túrlerin kóbeytiw boyınsha hár kúni izlenip, isbilermenlerge jol ashıwı zárúrligi atap ótildi.
Bıyıl xızmetler kólemin 15 procentke arttırıp, 82 milliard dollarǵa, eksporttı bolsa 8,5 milliard dollarǵa jetkeriw, tarawda 205 million adamdı dáramatlı etiw belgilengen. Eń úlken imkaniyat bank-qarjı tarawında. Sonıń ishinde, developerlerge jańa massivler aymaǵınıń 10-15 procentin turaq jay emes jaylarǵa ótkeriwge ruqsat berilgen. Bunnan nátiyjeli paydalanıw maqsetinde. bankler arqalı developerlerden múlklerdi tikkeley satıp alıw hám isbilermenlerge qolaylı shártlerde ijara yamasa lizingke beriw usınısı bildirildi. Bul arqalı 50 mıń kvadrat turaq jay emes jaylar háreketke kirisiwi, 100 mıń jumıs ornı jaratılıwı múmkin.
Qarjı xızmetleriniń kólemin 30 procentke arttırıw názerde tutılǵan. Máhálle bankleri jumıs baslap, xalıqqa jaqınlastırılǵanı bunda qosımsha imkaniyat. Atap aytqanda, adamlar kóp múrájat etetuǵın kadastr, salıq, ádillik maǵlıwmatların banklerdiń málimleme sisteması menen baylanıstırıw xızmetlerdiń kólemin keńeytedi.
Bıyıldan rayonlarda servisti rawajlandırıw boyınsha jańasha qatnas boladı. Bul baǵdarda 1 mıń 156 drayver joybar jergilikli keńeslerde tastıyıqlandı. Olardıń infrastrukturasına 1 trillion sum qaratıladı.
Sonıń ishinde, bıyıl 72 jaǵalıq boyında dem alıw orınları, kúni-túni isleytuǵın 154 turizm hám gastronomiyalıq kóshelerdi shólkemlestiredi. 62 dem alıw baǵı zamanagóy kóriniske keltiriledi. 364 jol boyı hám basqa da servis obyektleri qurıladı.
Eki jıl burın sawda hám xızmetler tarawındaǵı kárxanalarǵa sociallıq salıq 1 procent etip belgilengen edi. Ótken dáwirde kárxanalar sanı 1,5 esege kóbeygen. Áhmiyetlisi, kóp isbilermenler «saya»dan shıǵıp, aylıq miynet haqını durıs kórsetiwge ótiwiniń nátiyjesinde miynet haqı 3,2 esege kóbeyip, qosımsha 2,1 trillion sum salıq túsken.
Usılardı esapqa alıp, bul jeńillik múddetin jáne úsh jılǵa sozıw usınısı maqullandı. Endi bul jeńillik servis kárxanalarınıń keminde 3 million sum aylıq alatuǵın 30 jasqa shekemgi jumısshılarına qollanıladı. Qurılıs, sawda hám ulıwma awqatlanıw kárxanalarınıń jumısshıları menen qısqa múddetli, jeńilletilgen miynet shárnamasın dúziwi múmkin boladı.
Keyingi úsh jılda 27 túrdegi mámleketlik xızmetler jeke menshik sektorǵa beriledi. Biraq ministrlikler sistemasında isbilermenler isley alatuǵın xızmetler ele kóp. Bıyıl jáne 29 mámleketlik xızmet jeke menshik sektorǵa ótkeriletuǵını aytıldı.
Jer uchastkaları hám múlkti ijaraǵa alıw yamasa menshiklestiriw boyınsha ashıq-aydın, paydalı shártlerdi islep shıǵıw hám isbilermenlerge járiyalaw wazıypası berildi.

Ózbekstan Prezidentiniń 2024-jıl 20-dekabrde qol qoyılǵan aymaqlarda joqarı ekonomikalıq ósim hám xalıqtıń bántligin támiyinlewdiń jańa sistemasına baylanıslı pármanı bul baǵdarda úlken imkaniyat jarattı. Oǵan bola, bıyıl 1-marttan baslap, 10 mıń kvadratqa shekemgi hám 6 ay dawamında satılmaǵan rayonlardaǵı mámleketlik obyektler isbilermenlerge 10 jılǵa tikkeley ijaraǵa beriledi. Tórt jıl dawamında ijara haqı waqtında tólense, bul jer isbilermenge menshiklestirilip beriledi. Jaslardı IT hám shet tiline oqıtıp, xalıqaralıq tán alınǵan sertifikat beretuǵın isbilermenler birinshi jılı ijara tólemeydi.
Mámleketimiz basshısı aralıqtan xızmetler eksportın jańa basqıshqa kóteriw zárúrligin atap ótti. Bul ushın sırt ellerdegi xızmetler bazarın hám talapların úyrenip soǵan sáykes qánigelikler tayarlaw wazıypası berildi.
Bıyıl kreativ ekonomikadaǵı startap joybarlar ushın 50 million dollar ajıratılǵan. Bul arqalı jaslardıń baslamaların qollap-quwatlaw, sırt el kompaniyalarında jumıs isleytuǵın jerleslerimizdi tartıw maqset etilgen.
Ulıwma, bıyıl IT xızmetleriniń kólemin 30 procentke keńeytip, 80 trillion sumnan, eksporttı 1 milliard dollardan asırıw imkaniyatı bar ekeni aytıldı. Aymaqlardaǵı hám tarmaqlardaǵı xızmetlerdi sanlastırıw boyınsha da kórsetpeler berildi.
Servisti rawajlandırıwda qolaylı transport infrastrukturası oǵada áhmiyetli. Ótken jılı transport xızmetleri 8,6 procentke ósip, 145 trillion sumdı quradı. Biraq joqarı ekonomikalıq ósim ushın bul jetkilikli emes.
Sonlıqtan elimizdegi qalalar arasında samolyot hám poezd qatnawların kóbeytiw, multimodal logistika orayların qurıp, tranzit júk úlesin arttırıw, taksilerge qolaylılıqtı keńeytiw boyınsha qosımsha ilajlar belgilendi.
Bular arqalı bıyılǵı jılı transport xızmetleriniń kólemin 185 trillion sumǵa, eksporttı 2,3 milliard dollarǵa alıp shıǵıw múmkin ekeni kórsetip ótildi.
Xızmet baǵdarındaǵı eń úlken taraw bul turizm. Keyingi jıllarda 90 nan aslam mámleketler menen baylanıslar jaqsılanǵanınıń nátiyjesinde sırt elli turistler derlik 4 esege arttı. Ótken jılı turizm xızmetleriniń eksportı 3,5 milliard dollar boldı.

Biraq elimizdiń potencialı bunnan biraz joqarı. Máselen, Malayziya hám Indoneziya puqaraları Umraǵa barıwdan aldın ata-babalarımızdıń qábirin zıyarat etiwdi qáleydi. Olar ushın «Umra plyus» xızmeti jolǵa qoyılatuǵını belgilendi.
Samarqand, Shahrisabz, Buxara, Xiywa hám Tashkenttegi turistlik komplekslerde xalıqaralıq dárejedegi koncertler hám forumlar ótkeriw kópshilikti ózine tartadı. Keliwshiler miymanxana, restoran, sawda hám basqa da kewil ashar orınlarǵa da qarıydar boladı.
Sociallıq tarawlarda da imkaniyatlar kóp. Máselen, ótken jılı «Medicinalıq xızmetler miymandoslıǵı» baǵdarlaması jolǵa qoyılǵan edi. Bul sırt el puqaraların emlew hám eksporttı arttırıw ushın qolaylılıq.
Keyingi segiz jılda 125 jańa joqarı bilimlendiriw shólkemi ashılǵan. Biraq bul tarawdaǵı eksport imkaniyatlarına pútkilley sáykes emes. Yamasa bos turǵan ayırım mádeniyat hám kórkem óner orayların da jeke menshik sektorǵa beriw múmkin.
Májiliste Prezidentimiz juwapker hám isbilermenler menen sóylesti. Taraw juwapkerleri bıyıl aymaqlarda 2 million 500 mıń xalıqtı bánt etiw rejeleri boyınsha málimleme berdi.

ÓzA