Qaraqalpaqstan Respublikası Joqarǵı Keńesiniń Baslıǵı A.Orınbaevtıń basshılıǵında Qońırat, Qanlıkól, Xojeli, Moynaq hám Shomanay rayonlarındaǵı isbilermenlerdi qıynap kiyatırǵan mashqalalar hám usınısların tıńlaw maqsetinde ushırasıw ótkerildi.

Ushırasıwǵa rayonlardıń hákimleri, juwapker ministrlikler menen mákemelerdiń basshıları qatnastı.

Onda eksportyor kárxanalarǵa ámeliy járdemler kórsetiw, 2025-jılda ámelge asırılatuǵın baǵdarlamalar sheńberinde jańa investiciyalıq joybarlardı iske túsiriw arqalı jumıs orınların jaratıw, bul baǵdarda isbilermenlerdiń mashqalalarına sheshim tabıw hám hár tárepleme qollap-quwatlaw boyınsha jaqınnan pikirlesildi.

Atap ótilgenindey, Prezidentimizdiń basshılıǵında elimizde isbilermenlikti jáne de rawajlandırıw, olar ushın barlıq qolaylı sharayatlardı jaratıw baǵdarında keń kólemli reformalar ámelge asırılmaqta. Tek ǵana Qaraqalpaqstan ushın qabıl etilgen tariyxıy párman hám qararlar bul baǵdardaǵı ilajlar kólemin jańa basqıshqa kótermekte.

Ótkerilgen ilajda isbilermenlerdiń jumıslarında ushırasıp atırǵan mashqalalar úyrenilip, pikir-usınıslar bildirildi.

Hár qanday investiciya, óndiris hám sanaattı rawajlandırıw boyınsha islep shıǵılǵan joybarlar Prezidentimiz tárepinen bárqulla qollap-quwatlanatuǵınlıǵı Joqarǵı Keńes Baslıǵı tárepinen ayrıqsha atap ótildi.

Qaraqalpaqstan xabar agentligi