Qaraqalpaqstan Respublikası Ádillik ministriniń orınbasarı A.Prenov tiyisli taraw basshılarınıń qatnasıwında «Huqıqıy máhálle» joybarı sheńberinde Tórtkúl rayonındaǵı Anhorli mákan puqaralar jıyını turǵınları menen ushırasıw ótkerdi.

Onda Prezidentimizdiń 2025-jıl 3-yanvar kúngi «2025-jılı Respublika máhállelerinde qáwipsiz ortalıqtı jaratıw hám huqıqbuzarlıqlardıń aldın alıw sistemasınıń nátiyjeliligin jáne de arttırıw boyınsha ilajlar haqqında»ǵı qararınıń orınlanıwı boyınsha máhállelerde huquqbuzarlıqlar profilaktikası tarawındaǵı mámleketlik uyımlar hám shólkemlerge, sonday-aq, máhálle jetiligi, nuranıy hám kóshe biylerine túsinikler berilip, bukletler tarqatıldı.
Atap ótilgenindey, sońǵı jıllarda mámleketimizde xalıqtıń tınıshlıǵın támiyinlewdiń ulıwma jańa mexanizmlerin engiziw, huqıqbuzarlıqtıń júz beriwine sebepshi bolıp atırǵan sociallıq-turmıslıq mashqalalardı profilaktikalıq ilajlar sisteması arqalı sheshiw hám xalıqta qáwipsizlik sezimin qáliplestiriw boyınsha nátiyjeli ilajlar ámelge asırılmaqta.
Sonday-aq, máhállelerde qáwipsiz ortalıqtı jaratıwdıń shólkemlestiriw-profilaktikalıq tiykarların zaman talaplarına beyimlestiriw, júz beriletuǵın nızambuzıwshılıqlardıń tiykarǵı sebeplerin waqıtında anıqlaw hám kompleksli ilajlar menen mánzilli saplastırıw arqalı aldın alıw sistemasınıń nátiyjeliligin jáne de arttırıw áhmiyetli wazıypa sıpatında kúnniń wazıypası bolıp turıptı.
Maqset – Ózbekstan Respublikası Prezidentiniń 2023-jıl 11-sentyabrdegi “Ózbekstan – 2030” strategiyası haqqında”ǵı pármanınıń áhmiyetli maqsetlerine erisiw, sonıń menen birge, juwapker mámleketlik shólkemlerdiń respublika máhállelerinde huqıqbuzarlıqlar profilaktikası boyınsha jumısın 2025-jılda sapa jaǵınan jańa basqıshqa alıp shıǵıw bolıp esaplanadı.
Ilaj dawamında xalıqtıń kommunallıq xızmet, sociallıq taraw, pensiya, turaq jay hújjetlerin rásmiylestiriw hám miyras máselelerine baylanıslı 50 den aslam murájatleri tıńlanıp, belgilengen tártipte kórip shıǵıw ushın qadaǵalawǵa alındı.
Ilaj dawamında kóshpeli tártipte 46 mámleketlik xızmet kórsetildi.

Madina Jumabaeva,
QMU Qaraqalpaq filologiyası hám jurnalistika
fakultetiniń 2-kurs studenti.
Qaraqalpaqstan xabar agentligi.