«Mayıplıǵı bolǵan balalarǵa sociallıq xızmet hám járdem kórsetiw sistemasın jáne de jetilistiriw boyınsha qosımsha ilajlar haqqında»ǵı Prezident qararı qabıl etildi.

Qararǵa bola, 2025-jıl 1-marttan tájiriybe-sınaq túrinde basqıshpa-basqısh Qaraqalpaqstan Respublikası, Ándijan, Qashqadárya, Samarqand, Surxandárya hám Tashkent wálayatları sonday-aq, Tashkent qalasında, 2025-jıl 1-oktyabrge shekem respublikanıń qalǵan aymaqlarında 3 jastan 18 jasqa shekemgi mayıplıǵı bolǵan balalar ushın mámleketlik-jeke menshik sheriklik tiykarında kúndizgi tárbiyalaw xızmeti jolǵa qoyıladı.
Onda mayıplıǵı bolǵan balalar kúndizgi tárbiyalaw xızmetine olardıń ata-anaları menen «Insan» sociallıq xızmetler orayları arasında dúzilgen sociallıq shártnama tiykarında hám Psixologiyalıq-medicinalıq-pedagogikalıq komissiya tárepinen belgilengen tártipte berilgen juwmaqqa muwapıq qabıl etiledi.
2025-jıl 1-marttan kúndizgi tárbiyalaw xızmetine baylanıslı jumıstı ámelge asırıwshı isbilermenlerdi qollap-quwatlawdıń tómendegi tártibi engiziledi:
– kúndizgi tárbiyalaw xızmetinen paydalanılǵan bir kún ushın 3 jastan 7 jasqa shekemgi hár bir balaǵa bazalıq esaplaw muǵdarınıń 25 procenti muǵdarında hám 7 jastan 18 jasqa shekemgi hár bir balaǵa – 27 procenti muǵdarında subsidiya ajıratıladı;
Onda wálayatlardıń orayları, Tashkent hám Nókis qalaları ushın subsidiya muǵdarı 1,1 kóbeytiwshi koefficientti qollanıw arqalı anıqlanadı.
– Kámbaǵal shańaraqlar reestrine kirgizilgen shańaraqlardıń mayıplıǵı bolǵan hár bir balası ushın joqarıda belgilengen subsidiyanıń ulıwma muǵdarınıń 30 procenti muǵdarında qosımsha qarjı tólep beriledi.

ÓzA