Qaraqalpaqstan Respublikası Awıl xojalıǵı ministriniń birinshi orınbasarı A.Kozievtiń basshılıǵında Shomanay rayonındaǵı fermerler menen májilis ótkerilip, onda fermerler ushın jańa imkaniyatlar jaratıw hám olardıń abadanlıǵın arttırıwǵa qaratılǵan áhmiyetli máseleler dodalandı.

Májiliske “BIONOVATIK AGRO” kompaniyasınıń Orta Aziya aymaqlıq wákili A.Sultanov, Paxtashılıq departamentiniń baslıǵı F.Teshaev, awıl xojalıǵı tarawınıń tiyisli xızmetkerleri, paxta-toqımashılıq klasterleri hám fermerler qatnastı.
Májiliste Prezidentimizdiń baslaması menen Qaraqalpaqstan Respublikasında isbilermenlikti bunnan bılay da rawajlandırıw hám xalıqtıń abadanlıǵın támiyinlew baǵdarında ámelge asırılıp atırǵan jumıslar haqqında túsinikler berildi. Atap aytqanda, fermerlerge jaratılǵan jańa imkaniyatlar, olardı qollap-quwatlaw ilajları hám mámleket tárepinen ámelge asırılıp atırǵan baǵdarlamalar haqqında tolıq maǵlıwmat berilip, pikir-usınıslar bildirildi.
Bul ushırasıw Shomanay rayonındaǵı fermerlerge óz biznesin rawajlandırıw, zamanagóy texnologiyalardı qollanıw hám zúráátlilikti arttırıw boyınsha jańa bilim hám kónlikpelerdi iyelew imkaniyatın berdi.
Ilajda fermerler de ózleriniń pikir-usınısların bildirip, ózlerin qızıqtırǵan sorawlarǵa juwap aldı.

Qaraqalpaqstan xabar agentligi.