Aral mashqalası tek ǵana Qaraqalpaqstan yaki elimiz emes, al pútkil region ushın áhmiyetli esaplanadı. Qurıǵan teńiz ultanın jasıllandırıw, suw basseynlerin ashıw hám aqıbetlerin jumsartıw búginniń áhmiyetli máselesi bolıp esaplanadı. Usıǵan bola, Qaraqalpaqstan Respublikasınıń Aralboyı aymaǵında jasıl qamlamalar qurıw jumısları ámelge asırılmaqta.
Gezektegi kóklemzarlastırıw jumısları xalıqaralıq áhmiyetke iye A-380 xalıqaralıq avtomobil jolınıń «Qońırat-Beynew» aralıǵındaǵı 240 kilometrinde alıp barılmaqta. Onda Prezidentimizdiń Aralboyı regionının turaqlı rawajlandırıw máseleleri boyınsha keńesgóyi T. Xudaybergenovtiń basshılıǵında Qaraqalpaqstan Respublikası Joqarǵı Keńesiniń baslıǵı A.Orınbaev, AJB, Toǵay xojalıǵı agentligi hám basqa ministrlik, uyımlar juwapkerleri qatnaspaqta.
AJB maǵlıwmatlarına bola, bul máwsimde Aralboyı aymaǵındaǵı 2800 gektar maydanǵa 1 million 150 mıń túpke shamalas seksewil hám basqa shólge shıdamlı ósimliklerdi egiw rejelestirilgen.

ÓzA