Usı jıldıń 30-yanvar kúni Nókis qalası 22-sanlı balalar muzıka hám kórkem-óner mektebinde Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti tárepinen kárxana, mákeme hám shólkemlerdegi baslanǵısh kásiplik awqam shólkemleri basshılarınıń qatnasıwında 2024-jılı jámáátlik shártnama bántleriniń orınlanıwı hám 2020-jıldıń fevral ayınan 2025-jıldıń fevral ayına shekemgi islegen dáwiri ushın esabat-saylaw jıynalısına tayarlıq kóriw hám onı joqarı dárejede ótkeriw boyınsha oqıw-seminar bolıp ótti.

Seminardı Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti baslıǵı Jeńisbay Ayapov alıp bardı.
Seminarda Ózbekstan kásiplik awqamları Federaciyası Qaraqalpaqstan Keńesiniń shólkemlestiriw bólimi qánigesi Dáryabay Janızaqov hám Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti qánigesi Narzulla Ziuatdinovlar shıǵıp sóylep, usı jıldıń dáslepki aylarında barlıq kásiplik awqamları shólkemlerinde bolıp ótetuǵın jámáátlik shártnamalardıń orınlanıwı boyınsha ulıwma jıynalıstı hám esabat-saylaw jıynalısların ótkeriw tártip-qaǵıydaları tuwralı maǵlıwmatlar berildi.
Jámáátlik shártnamalar jumıs beriwshiler menen jumısshılar arasındaǵı miynetke baylanıslı, sociallıq-ekonomikalıq hám kásipke baylanıslı qatnasıqlardı tártipke salatuǵın miynet haqqındaǵı huqıqıy hújjet bolıp, ol arqalı táreplerdiń minnetli wazıypalarınıń ádil hám sapalı orınlanıwı támiyinlenedi.
Jámáátlik shártnamanıń ámel etiwi hár qanday kárxananıń tabıslı jumıs alıp barıwına, miynet mádeniyatı hám tártibiniń jaqsılanıwına, islewshilerdiń kásiplik mamanlıǵın jetilistiriw, tarif stavkaları hám jumıs bahalarınıń ámeldegilerge qaraǵanda tómenlewine jol qoymawǵa tiykar jaratadı.
Ózbekstan kásiplik awqamları Federaciyasına aǵza taraw kásiplik awqamlarınıń ustavlarına muwapıq ulıwma májilis (jıynalıs) baslanǵısh kásiplik awqam shólkemleriniń joqarı uyımı bolıp esaplanadı hám oǵan baslanǵısh shólkemniń baslıǵı (atqarıw) organın saylaw wákilligi berilgen.
Usı jerde bir áhmiyetli tárepine itibar qaratıw lazım. Federaciyaǵa aǵza taraw kásiplik awqamlarınıń ustavlarına muwapıq 15 ke shekem kásiplik awqamı aǵzaların birlestirgen baslanǵısh shólkemlerde kásiplik awqamı shólkemlestiriwshisi hám onıń orınbasarı saylanadı.
Al, 15 hám onnan aslam kásiplik awqamı aǵzaların birlestirgen baslanǵısh shólkemde kásiplik awqam komiteti (bólek byudjetine hám bankte esap betine iye bolsa – tekseriw komissiyası) saylanadı.
Jıynalıs yaki konferenciya ótkeriwdi baslanǵısh shólkemniń ózi sheshedi. Eger ulıwma jıynalıs ótkeriw imkaniyatı bolmasa, yaǵnıy baslanǵısh shólkemdegi kásiplik awqam aǵzaların bir jerge jıynaw múmkinshiligi bolmasa konferenciya ótkeriledi.
Ulıwma jıynalıs hám onı ótkeriw tártipleri derlik bir túrde bolsa da, ayırım tárepleri menen bir-birinen ózgeshelenedi. Sonı itibarǵa alıp, jıynalıstı ótkeriwge baylanıslı hújjetlerdiń usınıslıq xarakterdegi úlgileri boyınsha túsinikler berildi.
Atap aytqanda, baslanǵısh kásiplik awqam shólkeminiń esabat-saylaw jıynalısın shaqırıw haqqındaǵı qarardıń qalay tayarlanıwı, xızmetkerlerdiń kásiplik awqam shólkeminiń esabat-saylaw jıynalısına tayarlıq kóriw boyınsha jumısshı topardı dúziw tártipleri, ilajlar rejesin tayarlaw, qárejetler smetası, esabat bayanatlarında beriliwi kerek bolǵan maǵlıwmatlar, jıynalıslardı alıp barıw tártip-qaǵıydaları haqqında túsinikler berildi.

– 2020-2024-jıllarda kásiplik awqamları tárepinen ámelge asırılǵan jumıslarıńızdı “Ózbekstan-2030” strategiyasın ámelge asırıw procesinde barlıq baǵdarlarǵa, sonday-aq, tarawdı rawajlandırıw barısında erisilgen nátiyjelerge, respublikada hayal-qızlar hám jaslarǵa berilip atırǵan itibar, mámleketlik emes, kommerciyalıq emes shólkemlerdiń jumısların kúsheytiw boyınsha alıp barılıp atırǵan jumıslarǵa, xızmetkerlerge jámáát shártnamasında názerde tutılǵan qosımsha jeńillikler hám olardıń beriliwine, xızmetkerlerge 2024-jılı jámáátlik shártnama bántleriniń is beriwshi hám kásiplik awqam shólkemleri tárepinen orınlanıwı boyınsha ulıwma jıynalıstaǵı esabatlarǵa, xızmetkerlerge 2020-jıldıń fevral ayınan 2025-jıldıń fevral ayına shekemgi dáwirde ámelge asırılǵan jumıslar boyınsha esabat beriw ushın tiyisli hújjetlerge, esabat saylaw jıynalısı ádil hám sapalı ótiwine itibar qaratıwımız kerek,-deydi J.Ayapov.
Xızmetkerlerdi, ásirese, kem támiyinlengen shańaraqlardı qollap-quwatlaw boyınsha ámelge asırılǵan jumıslarǵa itibar qaratıw da áhmiyetli.
Seminar qatnasıwshıları ózleriniń pikir-usınısların bildirip, qánigelerden qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi