Taqıyatas rayonında sektor basshıları hám jaslar ushırasıwı bolıp ótti. Onda Taqıyatas rayonı hákimi Kamiljan Aytbaev, sektor basshıları, Jaslar isleri agentligi Oraylıq apparatı qánigesi Shaxzad Qayumov hám rayonnıń belsendi jasları qatnastı.
Ushırasıwda sektor basshıları tárepinen jaslardıń pikir-usınısları tıńlandı. Túrli tarawlarǵa qızıǵıwshı jaslar ózleriniń 10 nan zıyat múrájatlerin, qızıqtırǵan sorawların sektor basshılarına jolladı. Sektor basshıları kelgen múrájatlerdi qadaǵalawǵa alıp, tiyisli juwapkerlerge sol waqıttıń ózinde tapsırmalar berdi.

-Jaslar biziń keleshegimiz, búgin ámelge asırıp atırǵan iygilikli islerimizdiń dawamshıları, olardı hár tárepleme qollap-quwatlaw ushın biz bar kúsh-jigerimizdi ayamaymız,-dedi rayon hákimi óz sózinde.
Ushırasıwda jaslarǵa miynetten qashpawı, búgingi tınısh zamanımızdıń qádirine jetip, elimizdiń rawajlanıwına óz úleslerin qosıwı, ázelden ata-babalarımızdıń kásip-kári bolǵan diyqanshılıq penen shuǵıllanıwı kerekligi aytıp ótildi. Sol arqalı jaslar ózleriniń bántligin támiyinlew, shańaraǵına qosımsha dáramat tabıw múmkinshiligi bar ekeni túsindirildi.
Ushırasıw sońında jaslar tárepinen jollanǵan hár qanday múrájat tiyisli tártipte úyrenilip shıǵılatuǵını da ayrıqsha atap ótildi. Óz gezeginde jaslar da olarǵa jaratılıp atırǵan keń imkaniyatlardan durıs paydalanıp, mámleketimizdiń rawajlanıwına óz úlesin qosatuǵınlıǵın atap ótti.

Qaraqalpaqstan xabar agentligi