Nızam joybarına sholıw

Mámleketimizde xalıq arasında biyǵárez donorlıq mádeniyatın qáliplestiriw, donorlıq háreketin keń jámiyetshiliktiń qatnasıwında rawajlandırıwǵa ayrıqsha itibar qaratılmaqta. Qan donorlarına sapalı xızmet kórsetiw hám olar ushın qolaylı sharayatlar jaratıw, qan menen islesiw xızmeti mákemelerin joqarı texnologiyalıq úskeneler menen támiyinlew boyınsha kompleksli ilajlar ámelge asırılmaqta.
Sonıń menen birge, qan hám qan preparatların islep shıǵarıwdı jáne de kúsheytiw maqsetinde donorlardı qollap-quwatlaw, olarǵa beriletuǵın jeńilliklerdi nızam dárejesinde bekkemlew júdá áhmiyetli.
Usı maqsette islep shıǵılǵan nızam joybarı menen «Ózbekstan Respublikası húrmetli donorı» kókirek belgisi menen sıylıqlanǵan shaxslarǵa bir qatar jeńillikler berilmekte. Bul haqqında Oliy Majlis Nızamshılıq palatasınıń deputatı Gulnora Abduvohidova tolıq aytıp berdi.
Deputattıń atap ótiwinshe, «Ózbekstan Respublikası húrmetli donorı» kókirek belgisi menen sıylıqlanǵan shaxslarǵa olar ushın qolaylı bolǵan waqıtta hár jılǵı miynet dem alısına shıǵıw, qala transportınıń barlıq túrlerinen (jónelisli hám jónelissiz taksilerden tısqarı,) qalalararalıq transportlardan biypul paydalanıw huqıqı berilmekte.
Sonday-aq, sanatoriy-kurortlarda emleniw ushın jollamalardı gezeksiz alıw huqıqı názerde tutılmaqta. Bunnan tısqarı, olarǵa bazalıq esaplaw muǵdarınıń 15 esesi muǵdarında xoshametlenip barıladı.

ÓzA