YuNESKOnıń Parijdegi bas rezidenciyasında Mádeniyat hám kórkem ónerdi rawajlandırıw qorı baslıǵı Gayane Umerovanıń YuNESKO bas direktorı orınbasarı Gariela Ramos penen ushırasıwı bolıp ótti.

Ushırasıw dawamında Ábiw Rayxan Beruniy atındaǵı YuNESKO-Ózbekstan xalıqaralıq sıylıǵı xızmetin jolǵa qoyıw hám birinshi sıylıqlaw máresimin YuNESKO Bas konferenciyasınıń 43-sessiyası sheńberinde Samarqandta ótkeriw máseleleri dodalandı.
Sonday-aq, YuNESKOnıń gender teńlik máseleleri boyınsha direktorı Begoniya Lasagabaster menen ótkerilgen jumısshı ushırasıwlarda hayal-qızlardı qollap-quwatlaw tarawındaǵı birge islesiwdi bekkemlew, olardıń mádeniyat, bilimlendiriw hám sociallıq baslamalardaǵı qatnasıwı sıyaqlı áhmiyetli máseleler dodalandı.
«Ózbekstan-2030» strategiyası sheńberinde mádeniyat, kórkem óner hám sanlı texnologiyalar tarawlarında hayal-qızlardıń roli haqqındaǵı baslamalar kórsetildi. Kreativ taraw tarmaqlarında hayallar jetekshiligin rawajlandırıw, olardıń sanlı ortalıqtaǵı qatnası, sonday-aq, mádeniyat tarawında kásiplik jetiklikke erisiwi ushın sharayatlar jaratıw boyınsha joybarlar haqqında sóz etildi.
Ózbekstan jasalma erk-ıqrar texnologiyalarına tayar ekenligi haqqındaǵı YuNESKO esabatı, mámleketimizdiń YuNESKO Jaslar ánjumanındaǵı qatnasıwı hám YuNESKOnıń bas rezidenciyasında «Ózbekstan-Ullı Jipek jolı kesilispesinde» kórgizbesin shólkemlestiriw baslamalarına ayrıqsha itibar qaratıldı.

ÓzA