Xabarıńız bar, 2021-jıl 26-yanvardaǵı Ózbekstan Respublikası Oraylıq banki tárepinen qabıl etilgen qararlarǵa bola, (mámleketlik sanı 3285) puqaralar pasport penen birge ID-karta yamasa milliy aydawshılıq gúwalıǵı arqalı da bank xızmetlerinen paydalanıwı múmkin. Sonday-aq, Prezidenttiń «Ózbekstan Respublikasında identifikaciya ID-kartaların engiziw ilajları haqqında»ǵı pármanına muwapıq 2021-jıldan baslap ID-kartalar beriledi.

Sonıń menen birge, Ministrler Kabinetiniń «Ishki isler uyımları sistemasında mámleketlik xızmetler kórsetiwdiń sapasın jáne de jetilistiriw hám tártip-qaǵıydaların ápiwayılastırıw ilajları haqqında»ǵı qararınıń 6-bántine muwapıq jańa úlgidegi milliy aydawshılıq gúwalıǵına shaxstı tastıyıqlawshı rásmiy mámleketlik hújjet statusı berildi.
Qararǵa muwapıq Oraylıq bank basshılıǵı tárepinen qabıl etilgen 7 normativlik-huqıqıy ózgerisler kirgizildi. Oǵan muwapıq puqaralar pasport penen bir qatarda identifikaciya ID-kartaları yamasa milliy aydawshılıq gúwalıqların kórsetip, bank xızmetlerinen paydalanıwı múmkin.
Jańa úlgidegi milliy aydawshılıq gúwalıǵı shaxstı tastıyıqlawshı rásmiy mámleketlik hújjet statusına iye bolǵanı sebepli, ol bank xızmetlerin kórsetiw procesinde pasporttıń ornın basa aladı. Sonday-aq, esap bet ashıw, kredit yamasa depozit xızmetlerinen paydalanıw, bank plastik kartaların rásmiylestiriw múmkin.
Esletip ótemiz, jańa úlgidegi aydawshılıq gúwalıǵı bolsa, bankke ID-karta yamasa pasport alıp barıw shárt emes.

Sh.Mamaturopova, ÓzA