Ózbekstan Respublikasında kosmoslıq izertlewlerdi rawajlandırıw hám usı tarawdaǵı qatnasıqlardı tártipke salıwmaqsetinde «Kosmoslıq jumıs haqqında»ǵı Nızam qabıl etildi. Nızamǵa Prezident tárepinen 2025-jıl 13-yanvarda qol qoyılıp, rásmiy járiyalanǵan kúnnen baslap kúshke kiredi. Onda kosmoslıq jumıstıń nızamlı tiykarları belgilep berilgen bolıp, bul baǵdarda mámleketlik siyasattıń nátiyjeliligin arttırıw názerde tutılǵan.
Bul Nızamda kosmoslıq jumıstıń tiykarǵı maqsetleri sıpatında Ózbekstannıń turaqlı sociallıq-ekonomikalıq rawajlanıwına úles qosıw, qorǵanıw qábiletin bekkemlew hám qáwipsizlikti támiyinlew belgilengen. Sonday-aq, kosmoslıq izertlewlerden ekonomikalıq, ekologiyalıq, ilimiy hám málimleme tarawlarında paydalanıw arqalı mámlekettiń hár qıylı tarawların rawajlandırıw názerde tutılǵan. Nızam kosmoslıq izertlewlerdiń xalıqaralıq birge islesiw sheńberindegi nátiyjeliligin de arttırıwǵa xızmet etedi.
Kosmoslıq izertlewler hám texnologiyalar agentligi usı tarawda arnawlı wákillikli mámleketlik uyım etip belgilendi. Ministrler Kabineti bolsa kosmoslıq jumıs boyınsha birden-bir mámleketlik siyasattı ámelge asırıwdı támiyinleytuǵın tiykarǵı uyım sıpatında atap ótildi. Qorǵanıw ministrligi bolsa kosmoslıq imkaniyatlardan qorǵanıw hám qáwipsizlik máplerinde paydalanıw, sonday-aq, áskeriy kosmoslıq texnologiyalardı jaratıw jumısların muwapıqlastırıw wazıypasın atqaradı.
Nızamǵa muwapıq, kosmoslıq sistemalardıń bir neshe túrleri anıq belgilengen. Olar tómendegilerden ibarat: Jerdi aralıqtan zondlaw, kosmoslıq monitoring, mámleketlik kosmoslıq monitoringi, kosmoslıq baylanıs sisteması, joqarı anıqlıqtaǵı jasalma joldas navigaciya sisteması hám basqa da ilimiy hám kommerciyalıq maqsettegi kosmoslıq sistemalar. Bulardıń barlıǵı zamanagóy texnologiyalardan nátiyjeli paydalanıw imkaniyatın beredi.
Nızamnıń qabıl etiliwi Ózbekstanda kosmoslıq izertlewler hám texnologiyalardı rawajlandırıw, mámleketlik qáwipsizlikti bekkemlew, ilimiy izertlewlerdi kúsheytiw hám ekonomikanı joqarı texnologiyalıq sheshimler menen támiyinlewge baǵdarlanǵan. Bul hújjet kosmoslıq izertlewler tarawındaǵı xalıqaralıq birge islesiwdi jáne de rawajlandırıw ushın huqıqıy tiykar jaratadı.
Qaraqalpaqstan xabar agentligi