Respublikamızda 14-yanvar – «Watan qorǵawshıları kúni» múnásibeti menen ÓzLiDeP Qaraqalpaqstan Respublikalıq Keńesi, qalalıq hám rayonlıq Keńesleri tárepinen bayram ilajları kóterińkilik penen shólkemlestirilmekte.
Atap aytqanda, partiyanıń Qaraqalpaqstan Respublikalıq Keńesi hayal-qızlar mashqalaların úyreniw hám baslamaların qollap-quwatlaw bólimi, Nókis qalalıq Keńesi tárepinen Ózbekstan Respublikası Milliy gvardiyası Qaraqalpaqstan Respublikası aymaqlıq orayında «Mártler qorǵaydı Watandı!» temasında shólkemlestirilgen ruwxıy-aǵartıwshılıq ilaj hám jas áskerler qatnasıwındaǵı bayram ilajı kóterińki ruwxta bolıp ótti. Onda partiya belsendileri, deputatları, bolajaq jás áskerler, Milliy gvardiya xızmetkerleri hám veteranları qatnastı.
Ilaj Ózbekstan Respublikası Milliy gvardiyası Qaraqalpaqstan Respublikası aymaqlıq orayınıń áskerleri hám áskeriy orkestri tárepinen tayarlanǵan jawıngerlik háreketleri sáwlelengen shıǵıwlar hám áskeriy parad penen baslandı.
Bunnan soń bayram ilajı oraydıń májilisler zalında dógerek sáwbeti menen dawam etti.
Onda Qaraqalpaqstan Respublikası Joqarǵı Keńesiniń deputatı Amangul Bayrıeva, Xalıq deputatları Nókis qalalıq keńesiniń deputatları Oksana Seytnazarova, Iristi Kuttimuratovalar shıǵıp sóylep, ilaj qatnasıwshıların bayram menen qutlıqladı hám mámleketimizde alıp barılıp atırǵan tınıshlıq-tatıwlıq siyasatı, xalqımızdıń abadanlıǵı ushın ámelge asırılıp atırǵan reformalar, ásirese, jaslarǵa qaratılıp atırǵan itibar hám jaratılǵan atırǵan imkaniyatlar haqqında sóz etip, tınıshlıqtıń qádirine jetiw, imkaniyatlardan nátiyjeli paydalanıw sıyaqlı bir qatar usınısların bildirdi.
– Ana watanımız bárqulla óziniń márt jigitleri menen maqtanıp kelgen. Jigitlerimiz ata-ana hám shańaraǵın, ózi jasap atırǵan jurtınıń topıraǵın muqaddes bilip, Watandı qorǵaw ushın bárqulla tayar turıwdı wazıypa dep esaplaǵan. Usı bayramnıń belgileniwi xalqımızdıń óz milliy armiyasına sheksiz húrmetin, márt jigitlerge maqtanıshın bildiredi. Partiya jámááti tárepinen barlıq Watan qorǵawshıların usı múbárek bayram menen qutlıqlaymız hám olardıń shańaraǵında tınıshlıq, bekkem densawlıq tilep qalamız, – deydi Qaraqalpaqstan Respublikası Joqarǵı Keńesiniń deputatı Amangul Bayrıeva.
Haqıyqatında da, áskeriy xızmet jaslardıń ruwxıy hám fizikalıq jetikligi ushın áhmiyetli mektep wazıypasın óteydi.
Qızǵın sáwbet dawamında, jas áskerler ózlerin qızıqtırǵan sorawlarına taraw qánigeleri hám deputatlardan tolıq juwap aldı.
Ilaj juwmaǵında Milliy gvardiya xızmetkerleri hám jas áskerlerge partiyanıń estelik sawǵaları tapsırıldı.
Qaraqalpaqstan xabar agentligi