Xabarıńız bar, Ózbekstan Respublikası Prezidentiniń 2020-jıl 7-dekabrdegi «Sudyalardıń shın mánisinde biyǵárezligin támiyinlew hám sud sistemasında korrupciyanıń aldın alıw nátiyjeliligin arttırıw ilajları haqqında»ǵı pármanı menen sistemada ashıq-aydınlıqtı támiyinlew, sonday-aq, ádil sudlawdı ámelge asırıwda úlgili jumıs islep atırǵan sudyalardı xoshametlewdi jolǵa qoyıw maqsetinde «Ibratlı sudya» sıylıǵın shólkemlestiriw wazıypaları belgilenip, hár jıldıń juwmaǵına bola, jumısları menen ayrıqsha úlgi kórsetip, joqarı reyting kórsetkishlerine iye bolǵan sudyalarǵa 2022-jıldan baslap “Ibratlı sudya” sıylıǵın tapsırıw jaqsı dástúrge aynalǵan.

Usı pármannıń orınlanıwın támiyinlew maqsetinde sudyalardıń jumıslarınıń nátiyjeliligin ashıq-aydın bahalaw boyınsha milliy elektron reyting bahalaw programması iske túsirildi. Bul elektron sistema insan faktorın keskin sheklewdiń esabınan sudyalardıń jumısların ashıq túrde hám eń áhmiyetlisi qalıs bahalaw múmkinshiligin jarattı.
2024-jıldıń juwmaǵı boyınsha, Sudyalar Joqarǵı Keńesiniń qararı menen 18 sudya usınday itibarǵa ılayıq dep tabıldı. Bunday tán alıwǵa iye bolǵanlar arasında Joqarǵı sud sudyasınan rayon sudlarınıń sudyalarına shekem bar.
Búgin usı sıylıqlar óz iyelerine tapsırıldı. Sonıń menen birge, taǵı bir topar belsendi sudyalardıń ata-analarına Sudyalar Joqarǵı Keńesiniń minnetdarshılıq xatları da tapsırıldı.
Videokonferenc baylanıs túrinde ótkerilgen sıylıqlaw máresiminde sudyalar hám olardıń ata-anaları qatnastı.
2024-jıldıń juwmaǵına bola, “Ibratlı sudya” sıylıǵı menen sıylıqlanǵanlardıń arasında Jınayat isleri boyınsha Nókis qalalıq sudınıń tergew sudyası Rasul Nazarov ta bar.
Ilaj dawamında Qońırat rayonlar aralıq ekonomikalıq sudınıń baslıǵı Quwanıshbay Xojamuratovtıń ákesi Oralbay Xojamuratovqa Ózbekstan Respublikası Sudyalar Joqarǵı Keńesiniń atınan alǵısnama da bildirildi.
Maǵlıwmat ushın, búginge kelip, “Ibratlı sudya” sıylıǵı menen sıylıqlanǵan sudyalardıń sanı 68 ge jetti.

Qaraqalpaqstan xabar agentligi.