Jeti kúnlik ashlıq insan organizmin maylardı eritiw procesine nátiyjeli «ótkerip», miydiń islewi ushın áhmiyetli bolǵan beloklarda ózgerisler jasaydı – Londondaǵı malika Mariya universiteti hám Norvegiya sport ilimleri mektebiniń ilimpazları usınday juwmaqqa keldi. Izertlew nátiyjelerin Nature Metabolism baslımı járiyaladı.

Izertlewde 12 salamat kewilli (5 hayal, 7 er adam) qatnastı, olar bir hápte dawamında tek ǵana suw ishti. Ilimpazlar tájiriybege shekem, onıń dawamında hám juwmaqlanǵannan soń shama menen úsh mıńǵa shekem qan beloklarında júz bergen ózgerislerdi hár kúni belgilep bardı.
Aradan 48-72 saat ótip qatnasıwshılardıń organizmi maylardı jemire baslap, olardan glyukoza ornına tiykarǵı energiya dáregi sıpatında paydalanıwǵa ótti. Qatnasıwshılar jeti kún dawamında ortasha 5,7 kilogrammnan dene massasın joǵalttı. Olar tolıq awqatlanıwǵa qaytqannan soń, bulshıq etlerdiń massası úsh kúnde tiklenip, denedegi maydıń muǵdarı azayǵanı atap ótildi.
Ashlıq tiykarǵı aǵzalar, sonıń ishinde, miydiń jumısına tásir etiwshi beloklardan qanday ózgerislerge sebep bolatuǵını da úyrenildi. Anıqlanıwınsha, bul ózgerisler ashlıqtıń úshinshi kúninen baslanǵan hám olar massa joǵaltıw menen baylanısqa iye emes.

Qaraqalpaqstan xabar agentligi