«Mámleketlik mektepke shekemgi bilimlendiriw shólkemlerinde salamat awqatlandırıw tártibin jetilistiriw ilajları haqqında»ǵı Húkimet qararı qabıl etildi.
Qararǵa bola, tómendegiler ámelge asırıladı:
– mámleketlik mektepke shekemgi bilimlendiriw shólkemlerin basqıshpa-basqısh autsorsing usılında awqatlandırıw sistemasına ótkeriw;
– «Birden-bir máwsimlik taǵamnama»nı engiziw hám azıq-awqat qárejetleriniń esabın «Balalar baqshası» mektepke shekemgi bilimlendiriwdi basqarıw málimleme sistemasında jaratılǵan moduller arqalı alıp barıw;
– mámleketlik baqshalarda tárbiyalanıwshılardı «Birden-bir máwsimlik taǵamnama» tiykarında respublika aymaqları kesiminde bir tárbiyalanıwshı ushın kúnlik awqatlandırıw qárejetin belgilew arqalı awqatlandırıw.
Sonday-aq, Bilimlendiriw tarawında awqatlandırıwdı shólkemlestiriw hám qadaǵalaw orayı shólkemlestiriledi.
Mámleketlik mektepke shekemgi hám ulıwma orta bilimlendiriw shólkemlerinde salamat awqatlandırıwdı shólkemlestiriwdi muwapıqlastırıw hám processlerdi basqıshpa-basqısh sanlastırıw Oraydıń tiykarı jumıs baǵdarlarınan biri etip belgilendi.
Qarar menen «Mámleketlik mektepke shekemgi bilimlendiriw shólkemlerinde autsorsing usılında salamat awqatlandırıwdı shólkemlestiriw tártibi haqqında»ǵı reje tastıyıqlandı.
Mámleketlik baqshalarda tárbiyalanıwshılardıń salamat, qáwipsiz hám sapalı awqatlanıwın támiyinlew maqsetinde 2025-jıl 1-iyulge shekem «Birden-bir máwsimlik taǵamnama» engiziledi.
2025-jıl 1-iyulge shekem salamat awqatlandırıw shólkemlestiriletuǵın mámleketlik baqshalarda isbilermenler menen belgilengen tártipte shártnamalar dúziliwi hám autsorsing usılında salamat awqatlandırıw jolǵa qoyılıwı támiyinlenedi.
ÓzA