Búgin Oliy Majlis Nızamshılıq palatasındaǵı Ózbekstan Еkologiyalıq partiyası frakciyasınıń gezektegi májilisi bolıp ótti. Májiliste dáslep «Donarlıq háreketin qollap-quwatlaw sisteması jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızam joybarı birinshi oqıwda kórip shıǵıldı.
Atap ótilgenindey, bul nızam joybarında «Ózbekstan Respublikası húrmetli donorı» kókirek belgisi menen sıylıqlanǵanlarǵa olar ushın qolaylı bolǵan waqıtta hár jılǵı miynet dem alısına shıǵıw, qalalıq jámiyetlik transporttıń barlıq túrlerinen (jónelisli hám jónelissiz taksilerden tısqarı) biypul paydalanıw, sanatoriya-kurortlarda emleniw ushın jollamalardı gezeksiz alıw huqıqın beriw máseleleri názerde tutılmaqta.
Frakciya aǵzaları joybar haqqında pikir bildirer eken, onıń qabıl etiliwi medicina salasında qan rezervleri hám biyǵárez donorlar sanınıń artıwına, bul óz gezeginde, tarawdıń rawajlanıwına xızmet etetuǵının atap ótti.
Sonday-aq, májiliste puqaralar jıyınları baslıqların saylawdı shólkemlestiriw hám ótkeriw tártibin bunnan bılay da jetilistiriw, bosap qalǵan orınlarǵa saylanǵan puqaralar jıyınları baslıqları jumısınıń kepilliklerin bekkemlewge qaratılǵan nızam joybarı birinshi oqılıwda kórip shıǵıldı.
Bir topar deputatlar tárepinen islep shıǵılǵan bul joybar menen puqaralar jıyını baslıǵı wákillikleriniń múddetin úsh jıldan bes jılǵa ózgertiw, sonday-aq, puqaralar jıyını baslıǵı wákilliklerin múddetinen burın toqtatılǵan jaǵdayda bosap qalǵan orınlarǵa saylaw ótkeriw arqalı saylanǵan jańa puqaralar jıyını baslıǵınıń da wákillik múddetin bes jıl etip belgilew usınıs etilmekte.
Nızam joybarı boyınsha frakciya aǵzaları bir qatar pikir-usınıslar bildirip, onı maqulladı.
Muhtarama Komilova,
ÓzA