Tuniste qılıshlasıw sportınıń sablya túri boyınsha ótkerilgen Gran-pri turniri óz juwmaǵına jetti.
Bul jarısta qatnasqan saylandı komandamız quramında eń jaqsı orındı Zaynab Dayıbekova iyelewge miyasar boldı. Atap aytqanda, ol jarıstıń dáslepki basqıshında Olimpiada oyınlarınıń eki márte gúmis medalı iyesi franciyalı Sara Balserdi jeńip shıǵıwǵa eristi. Tilekke qarsı, Zaynab sherek finalda basqa bir francuz sportshısı Sara Nuchaǵa jeńilip qaldı.
Al, Gúlistan Perdebaeva hám Fernanda Еrrera arasındaǵı 1/32 final ushırasıwında bolsa, Еrreraǵa áwmet kúlip baqtı. Bunnan keyingi basqıshta Fernanda usı jarıstıń bolajaq jeńimpazı yaponiyalı Misaki Еmuraga 14:15 jeńilip qaldı.
Jigitlerimiz arasında Islambek Abdazov da 1/8 finalda óz júrisin toqtatıwǵa májbúr boldı.

Adilbay Orazov,
Qaraqalpaqstan xabar agentligi sholıwshısı