Saudiya Arabstanınıń Jidda qalasında futbol boyınsha Ispaniya Superkuboginiń ekinshi yarım final oyınları bolıp ótti.
Onda Madridtiń «Real» klubı «Malorka» menen ushırasıp, 3:0 esabında jeńip shıǵıwǵa eristi. «King Abdullah Sports City» stadionında ótkerilgen oyınnıń birinshi taymında esap ashılmaǵan bolsa, ekinshi taymnıń 63-minutında Djud Bellingem «Malorka» dárwazasın anıq nıshanǵa alıwǵa miyasar boldı.
Ushırasıwdıń 90+2 minutında «Malorka» qorǵawshısı Valent óz dárwazasına kútilmegende gol urıp, «Real»dıń tolıq ústinligin támiyinlegen bolsa, 90+5 minutta Rodrigo oyınǵa sońǵı noqattı qoydı.
Solay etip, oǵada qıyın ótken ushırasıwda Madrid klubı finalǵa jol aldı hám 12-yanvardan 13-yanvarǵa óter aqshamda ótkeriletuǵın oyında óziniń ázeliy qarsılası «Barselona» menen ushırasadı.

Adilbay Orazov,
Qaraqalpaqstan xabar agentligi sholıwshısı