«Qamaqtaǵılar da óz huqıqlarına iye hám bul huqıqlar húrmet etiliwi kerek, hátteki olar jazalanǵan bolsa da. Eger biz insannıń huqıqların biykarlasaq, biz onıń insanıylıǵın biykarlaymız…» Belgili mámleketlik ǵayratker Nelson Mandelanıń bul sózleri hár qanday insandı adamgershilikke, miyrim-shápáátke shaqıradı.
Jınayat-atqarıw kodeksiniń tiyisli statyalarına Ishki isler ministrligi basqarıwındaǵı barlıq jazanı orınlaw mákemelerinde jaza múddetin ótep atırǵan qamaqtaǵılarǵa aralıqtan video-ushırasıw huqıqın beriwdi názerde tutatuǵın ózgeris hám qosımshalar kirgizilmekte.
Usı tártipti óz ishine alǵan nızam joybarı Oliy Majlis Nıızamshılıq palatasınıń májilisinde ekinshi oqıwda kórip shıǵıldı. Deputat Saydulla Azimov joybar boyınsha tolıq maǵlıwmat berdi.
Atap ótilgenindey, qamaqtaǵılarǵa aralıqtan video-ushırasıw huqıqı beriw arqalı olarǵa óz jaqınları menen onlayn ushırasıw imkaniyatı jaratıladı. Joybarda qamaqtaǵılardıń aralıqtan video-ushırasıw huqıqın ámelge asırıw sanı, shártleri hám tártibi, qosımsha video-ushırasıw imkaniyatları tolıq óz kórinisin tappaqta. Bul nızam joybarınıń qabıl etiliwi qamaqtaǵılardıń shańaraq aǵzaları menen sóylesiw imkaniyatın keńeytiwge, puqaralardıń áweregershiliginiń aldın alıwǵa xızmet etedi.
Dodalawlardan soń nızam joybarı deputatlar tárepinen qabıl etildi.
Muhtarama Komilova, ÓzA