Nókis qalası orayındaǵı «Xalıqlar doslıǵı» maydanında ornatılǵan jańa jıl shırshası átirapında Berdaq atındaǵı Qaraqalpaq mámleketlik universiteti tárepinen «Jıl studenti 2024» respublikalıq tańlawınıń universitet basqıshı jeńimpazların sıylıqlaw máresimi bolıp ótti.

Ilajda universitet rektorı Axmed Reymov student-jaslardı jańa jıl bayramı hám tańlawda qolǵa kirgizgen tabısları menen qutlıqlap, mámleketimiz basshısı Sh.Mirziyoev tárepinen qaraqalpaqstanlı jaslarǵa berilip atırǵan keń imkaniyatlar menen múmkinshiliklerdi atap ótti.
-Óziniń keleshegin oylaǵan jaslarımız bunday keń imkaniyattan nátiyjeli paydalanıwı tiyis hám keleshekte Watanımızdıń rawajlanıwı jolında pidákerlik penen xızmet etiw zárúr ,-dedi rektor óz sózinde.
Bunnan soń «Jıl studenti 2024» tańlawınıń universitet basqıshı jeńimpazları hám jámiyetlik jumıslarda belsendilik kórsetip júrgen bir qatar studentler anıqlanıp, olar universitet rektoratı tárepinen múnásip túrde xoshametlendi.
-Ótkerilgen tańlaw juwmaǵında, «Jıldıń eń belsendi ziyrek studenti» nominaciyası boyınsha 1-orındı iyelep, rektorımız tárepinen úsh million sumlıq vaucher menen sıylıqlandım. Bizlerdiń azı-kem islegen dóretiwshilik islerimizdi inabatqa alıp, saltanatlı túrde sıylıqlap atırǵanı ushın universitet basshıları hám tańlaw tóreshilerine ózimniń tereń minnetdarshılıǵımdı bildiremen,-deydi kórkem óner fakultetiniń 4-kurs studenti Gúlzada Qudaybergenova.
Maǵlıwmat ushın aytatuǵın bolsaq, «Jıl studenti» respublikalıq tańlawınıń universitet basqıshında student-jaslar 7 nominaciya boyınsha qatnasıp, onda úzliksiz (akademiyalıq tánepissiz) kúndizgi bilimlendiriw túrinde oqıp atırǵan 2-3 hám 4-kurs studentleri arasında qatnasıwshılardıń usı jılda ózleri tárepinen jaratılǵan ilimiy jumısları, oylap tabıwları, innovaciyalıq ideyaları, racionalizatorlıq usınısları, shólkemlestiriwshilik qábileti hám usı tiykarda ózi shólkemlestirgen ilajlar, qolǵa kirgizgen tabısları, olardıń jańalıǵı, ilimiy áhmiyetliligi tóreshiler tárepinen kórip shıǵılıp, múnásip bahalandı.
Ilaj mádeniyat xımetkerleri tárepinen tayarlanǵan koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı.