Búgingi kúnde Qarakalpaqstan Respublikasında terini qayta islew menen shuǵıllanıwshı 15 ten aslam kárxana bar.

Solardıń biri Nókis qalasındaǵı Turan mákan puqaralar jıyınında jumıs islep turǵan “AFK CHARM NUKUS” shańaraqlıq kárxanası esaplanadı. Bul kárxananıń direktorı, Sawda-sanaat palatasınıń belsendi aǵzası – Azatbay Bekimbetov 2018-jıldan baslap óz jumısın baslaǵan.
― Dáslep, ayaq kiyimlerdi ońlaw ustaxanasın ashıp, óz jumıslarımızdı basladıq. Búgingi kúnde bılǵarı(koja)dan er adamlardıń ayaq kiyimlerin tigiw menen de shuǵıllanıp atırmız. Sapalı bılǵarı materialların Tashkent qalası hám Ándijan wálayatlarınan alıp kelip, óz qarjılarımız esabınan alǵan 2 arnawlı tigiw mashinaları járdeminde sapalı etik, gewish, mási, krossovka hám basqa da er adamlar ushın arnawlı ayaq kiyimlerdi tayarlap kelmektemiz. Házirgi waqıtta buyırtpalarımız hám qarıydarlarımızdıń sanı kún sayın artıp barmaqta,-deydi kárxana basqarıwshısı Pirlepes Bekimbetov.
Isbilermen búgingi kúnde 4 puqaranı turaqlı jumıs penen támiyinlegen. Aldaǵı waqıtları jeke brendine tiykar salıp, jańa texnikalar alıp keliw arqalı biznesin bunnan bılay da rawajlandırıwdı maqset etken.

Qaraqalpaqstan xabar agentligi.