Nókis qalasında Nѳkis áskeriy Sudı imaratı hám Taqıyatas rayonında jınayat isleri boyınsha Taqıyatas rayonlıq sudı imaratınıń ashılıw máresimi ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep jańa imarat paydalanıwǵa tapsırılıwı múnásibeti menen jıynalǵanlardı qutlıqladı.
Ashılıw saltanatında Ózbekstan Respublikası Joqarı Sudı baslıǵı B.Islamov hám Ѳzbekstan Respublikası Áskeriy sudınıń baslıǵı S.Еshankulov qatnastı.
Atap ótilgenindey, tarawdaǵı reformalardıń ámelge asırılıwın támiyinlewde, ásirese, xalqımızdıń haqıyqatlıqqa hám ádillikke bolǵan isenimin jáne de bekkemlewde Sudlardıń tutqan ornı ayrıqsha sanaladı. Sonlıqtan da sudlardıń materiallıq-texnikalıq bazasın bekkemlew, sud xızmetkerleri ushın múnásip jumıs sharayatların jaratıw baǵdarında keń kólemli reformalar alıp barılmaqta.
Nѳkis áskeriy sudınıń imaratı 7 mlrd. sumlıq qarjı esabınan jańadan qurıp pitkerilip, áskeriy sud xızmetkerleri ushın barlıq qolaylı sharayatlar jaratıldı. Sonday-aq, jınayat isleri boyınsha Taqıyatas rayonı sudınıń jańa imaratı investiciya baǵdarlaması tiykarında 7 mlrd. sum qarjı esabınan 2 qabatlı etip, zamanagѳy kѳriniste qurıp pitkerildi.
Álbette, bul jańa imaratlar elimizde nızam ústinligin támiyinlew jolında xızmet etedi.
Qaraqalpaqstan xabar agentligi