Senattıń ekinshi jalpı májilisi dawam etpekte. Májilistiń ashılıwında Prezidentimiz Shavkat Mirziyoevtiń parlament, atap aytqanda, Senat aldına qoyǵan áhmiyetli wazıypalarına itibar qaratıldı.

Senattıń birinshi májilisinde mámleketimiz basshısı mámleketimizdiń keyingi siyasiy, sociallıq-ekonomikalıq rawajlanıwın támiyinlew boyınsha strategiyalıq baǵdarların belgilep bergeni atap ótildi.
Sonnan kelip shıǵıp, keńes qararı menen Senattıń perspektivaǵa mólsherlengen Háreketler baǵdarlaması qabıl etildi. Onda Senat aldına qoyılǵan tiykarǵı wazıypalarındı ámelge asırıw boyınsha qırıqqa shamalas anıq ilajlar hám olardı ámelge asırıwdıń anıq mexanizmleri ashıp berilgen.
Senat Baslıǵı Tanzila Norboeva nızamshılıq tarawında jańa sistemada islew jolǵa qoyılǵanın atap ótti.
-Prezidentimizdiń atap ótkenindey, nızamlarda aymaqlıq hám ulıwma mámleketlik máplerdiń úylesiwine erisiw kerek, dedi T.Norboeva. – Bárinen burın, nızamlardı jergilikli keńesler menen dodalaw procesine tek ǵana orınlardaǵı deputatlardı emes, al barlıq jámiyetshilikti, máhálle belsendilerine shekem nızam dóretiwshiligi procesine jáne de keńnen tartamız. Endigiden bılay, Senat bul baǵdarda tiykarınan deputatlar menen birge isleydi. Nızamshılıq usınısı birinshi gezekte tómennen, jergilikli dárejeden kelip shıǵıwına erisedi. Parlament qadaǵalawın alıp barıwda tiykarǵı itibar aymaqlarǵa qaratıladı.
Mámleketimiz basshısı tárepinen sociallıq-ekonomikalıq tarawlarda anıq wazıypalar hám úlken shekler qoyılmaqta. Mısal ushın, Prezidentimiz tárepinen tastıyıqlanǵan «Kámbaǵallıqtan abadanlıqqa qaray» baǵdarlamasına muwapıq, kelesi jılda 1,2 million xalıqtı kámbaǵallıqtan shıǵarıw ushın áhmiyetli sociallıq máselelerdi sheshiw boyınsha anıq wazıypalar belgilendi.
Mámleketimiz basshısı, sonday-aq, energetika, transport, qurılıs, awıl xojalıǵı, azıq-awqat qáwipsizligi, medicina, sport, mádeniyat, ekologiya, xalıqtıń bántligin támiyinlew sıyaqlı kóplegen sociallıq-ekonomikalıq tarawlardı da búgingi kún talapları tiykarında, xalıqqa jeńillik jaratıw kózqarasınan rawajlandırıw boyınsha zárúr ilajlardı belgilep berdi. Soǵan tiykarlanıp wálayat hákimleri tárepinen hár bir aymaqtı rawajlandırıw boyınsha baǵdarlamalar usınıs etildi. Onda hár bir aymaqtıń ózine tán ózgesheliklerinen hám real mashqalalarınan kelip shıqpaqta.
Endigiden bılay, bul baǵdarlamalardıń «máhálle – rayon – wálayat» kesiminde orınlanıwın támiyinlewge, ásirese, sociallıq-ekonomikalıq rawajlanıw boyınsha «qızıl» aymaqlarǵa Senat hám jergilikli keńesler tárepinen ayrıqsha itibar qaratıladı. Maqset birew: adamlardı razı etiw!, -dep ayrıqsha atap ótti Senat Baslıǵı.

ÓzA