17-dekabr kúni Qatarda FIFA tárepinen ótkerilgen The Best sıylıǵınıń hár bir nominaciyasi boyınsha jeńimpazları járiyalandı. Oǵan bola, «Real» futbolshısı Vinisius Junior «Jıldıń eń jaqsı oyınshısı» dep tabıldı.

Jeńimpazlıq ushın bolǵan gúreste ol Jud Bellingem, Dani Karvaxal, Kilian Mbappe, Federiko Valverde (barlıǵı «Real»), Еrling Xoland, Rodri («Manchester Siti»), Toni Kroos, Lionel Messi («Inter Mayami»), Florian Virc («Bayer») hám Lamin Yamal («Barselona») sıyaqlı futbolshılardı artta qaldırıwǵa eristi.
Al, «Jıldıń eń jaqsı treneri» nominaciyasında bolsa, «Real» klubı treneri Karlo Anchelotti eń kóp dawıs toplawǵa erisip, «Arsenal» komandasınıń burinǵı ustazı Arsen Vengerden arnawlı sıylıqtı qabıl etip aldı.
Bul sıylıqqa dawagerler arasında Pep Gvardiola (“Manchester Siti”), Lionel Skaloni (Argentina saylandı komandası), Luis de la Fuente (Ispaniya saylandı komandası) hám Xabi Alonsolar (“Bayer”) da bar edi.
«Jıldıń eń jaqsı dárwazamanı» sıylıǵı bolsa, “Aston Villa” hám Argentina saylandı komandası dárwazamanı Еmiliano Martineske nesip etti. Bul sıylıq ushın bolǵan gúreste Andrey Lunin (“Real Madrid”), David Raya (“Arsenal”), Еderson (“Manchester Siti”) Janluijji Donnarumma (“PSJ”) Mayk Menyan (“Milan”), Unai Simon (“Atletik”)lardı jeńip shıǵıwǵa eristi.
“Manchester Yunayted”tiń argentinalı yarım qorǵawshısı Alexandro Garnacho tárepinen 2023-jıldıń 26-noyabr kúni “Еverton” dárwazasına akrobatikalıq usılda urǵan golı FIFA tárepinen jıl golı dep tabılıp, futbolshı Pushkash sıylıǵın qolǵa kirgizdi.
Laureatlar milliy saylandı komanda sárdarları, trenerler, jankúyerler hám ǵalaba xabar quralları wákilleriniń dawıs beriwi arqalı anıqlandı.

Adilbay Orazov,
Qaraqalpaqstan xabar agentligi sholıwshısı.