Shomanay rayonı hákimliginiń investiciya bólimi, málimleme xızmeti tárepinen ǵalaba xabar qurallarınıń xızmetkerleri, blogerler ushın rayonda ámelge asırılıp atırǵan investiciyalıq joybarlar tiykarında shólkemlestirilgen isbilermenlik subektlerine media-tur shólkemlestirildi.

Media-tur dawamında rayondaǵı Qarabaylı mákan puqaralar jıyını aymaǵındaǵı “Agro Shomanay Klaster” JShJnıń paxta tazalaw zavodı, Birleshik awıl puqaralar jıyını aymaǵındaǵı “Sultan bereketli sharwa” fermer xojalıǵı, Aqjap awıl puqaralar jıyını aymaǵındaǵı “NUKUS AQUA MIR” toyxanası, Monshaqlı mákan puqaralar jıyını aymaǵında jaylasqan ónerment “Náwbetova Altınay” jeke isbilermenlik subyektiniń jumısları menen tanısıp, investiciyalıq joybarlardıń ámelge asırılıwı, isbilermenlik subyektleriniń jumısı hám olardıń rawajlanıw perspektivaların úyreniw imkaniyatına iye boldı.
Media-tur qatnasıwshıları dáslep, “Agro Shomanay Klaster” JShJnıń «Paxta tazalaw zavodın shólkemlestiriw» joybarı tiykarında iske qosılǵan kárxanaǵa alıp barıldı.
Ózbekstan Respublikası Prezidentiniń 2022-jıl 23-24-fevral kúnleri Qaraqalpaqstan Respublikasına saparı dawamında berilgen tapsırmalarǵa muwapıq “Agro Shomanay Klaster ” JShJ tárepinen 31,5 mlrd. sumlıq “Paxta tazalaw zavodı” joybarın ámelge asırıw belgilengen edi. Kárxana jılına 20 mıń tonna paxtanı qayta islew quwatlılıǵına iye. Kárxanada búgingi kúnde 3 smenada 100 den aslam adam jumıs menen támiyinlengen. Qatnasıwshılar kárxanadaǵı jumıs processleri menen tanısıp, jumısshılar menen sáwbetlesip qızıqtırǵan sorawlarına juwap aldı.
«Sultan bereketli sharwa» fermer xojalıǵı Ózbekstan Respublikası Prezidentiniń 2020-jıl 2-oktyabrdegi Qaraqalpaqstan Respublikasına saparı dawamında ótkerilgen májliste berilgen tapsırmalarǵa muwapıq, Qarabaylı MPJ da shólkemlestirilgen. Násilli qaramal saqlawdı rawajlandırıwǵa baǵdarlanǵan bul joybardıń bahası 1,2 mlrd. sum bolıp, sonnan óz qarjısı 400 mln. bank krediti 800 mln. sumdı quraydı. Joybar sheńberinde Avstriya mámleketinen 27 bas simmental násilli qaramallar alıp kelingen. Joybardı iske túsiriw nátiyjesinde jańa 5 jumıs ornı jaratılǵan.
Búgingi kúnde usı násilli qara mallardı kóbeytiw hám sharwashılıqtı rawajlandırıw jumısları alıp barılmaqta.
“NUKUS AQUA MIR” JShJ toyxana xızmetin shólkemlestiriw boyınsha rayonda 2024-jılǵı investiciyalıq baǵdarlamaǵa muwapıq shólkemlestirilgen. Bul toyxana rayonda ashılǵan usı dárejedegi eń dáslepki toyxana ekenin atap ótiwimiz kerek. Joybar bahası 3,5 mlrd. sumdı quraydı.
Joybardı ámelge asırıw maqsetinde rayon hákimligi tárepinen 0,24 gektar jer berilip, Milliy bank tárepinen 1,0 mlrd. sumlıq kredit ajıratılǵan. Ámelge asırılǵan jumıslar nátiyjesinde 400 orınlıq toyxananıń jumısı jolǵa qoyıldı hám 15 jańa jumıs orınları jaratıldı.
Media-tur qatnasıwshıları “Náwbetova Altınay” jeke isbilermenlik subyektine de alıp barıldı. Tiykarınan túye júni hám terilerden kiyiz, baypaq, shulıq, kórpe, kórpeshe hám basqa da kerekli buyımlardı, buyırtpaǵa tiykarlanıp kiyim-kensheklerdi tigiw menen shuǵıllanatuǵın bul cex Shomanay rayonında 2024-jılǵı investiciyalıq baǵdarlamaǵa muwapıq 1,0 mlrd. sumlıq qarjı esabınan iske túsken.
Joybardı ámelge asırıw maqsetinde rayon hákimligi tárepinen Mádeniyat MPJ aymaǵında 300 kv.m. lik bos turǵan jer berilip, qurılıs hám úskenelerdi montajlaw jumısları alıp barıldı.
Intakerler tárepinen Germaniya Xalıqaralıq birge islesiw jámiyetiniń grantı tiykarında Rossiya Federaciyasınan 90 mıń AQSh dollarlıq, jıllıq islep shıǵarıw quwatlılıǵı 30 tonnalıq júndi qayta islew múmkinshiligine iye úskene alıp kelindi. Búgingi kúnde kárxana tárepinen islep shıǵarılǵan ónimler jergilikli bazarlarda satılmaqta.
Bul ilaj rayonnıń ekonomikalıq potencialın kórsetiwge, investiciya tartıwǵa hám isbilermenlikti rawajlandırıwǵa qaratılǵanlıǵı menen áhmiyetli. Media-tur dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi