Ózbekstan Respublikası Prezidenti Shavkat Mirziyoevtiń Saudiya-Ózbekstan Isbilermenler keńesi baslıǵı, “ACWA Power” kompaniyasınıń baslıǵı Muhammad Abunayyan menen ushırasıwında Saudiya Arabstanınıń jetekshi kompaniyaları menen óz-ara paydalı birge islesiwdi keńeytiw máseleleri kórip shıǵıldı.

Mámleketimiz basshısı Ózbekstanda «jasıl energetika» tarawında strategiyalıq investor esaplanǵan “ACWA Power” kompaniyası menen nátiyjeli sheriklik jedel rawajlanıp baratırǵanın úlken qanaatlanıwshılıq penen atap ótti. Búgingi kúnge shekem ulıwma bahası derlik 3 milliard dollarlıq 4 joybar tabıslı ámelge asırılǵan bolıp, bul joybarlardıń portfeli 15 milliard dollardı quramaqta.
Bunnan tısqarı, búgin bir qatar birgeliktegi joybarlardı iske qosıw máresimi bolıp ótti: Buxara wálayatında quwatlıǵı 500 megavatt bolǵan 2 samal elektr stanciyası tarmaqqa jalǵandı, sonday-aq, Samarqand wálayatında ulıwma quwatlıǵı 1 gigavatt bolǵan 2 quyash elektr stanciyası hám Tashkent wálayatında 334 megavatt quwatlıqqa iye energiya saqlaw sisteması qurılısına start berildi.
Ushırasıwda energetika, transport hám kommunal infrastrukturanı modernizaciyalaw, málimleme-kommunikaciya texnologiyaların rawajlandırıw, toqımashılıq sanaatı, awıl xojalıǵı hám basqa áhmiyetli baǵdarlarda kooperaciya joybarların ámelge asırıwǵa ayrıqsha itibar qaratıldı.
Birgeliktegi Isbilermenler keńesiniń jumısı sheńberinde Saudiyanıń jetekshi kompaniyaların mámleketimizge tartıw baǵdarındaǵı jumıslardı keńeytiw áhmiyetli ekeni atap ótildi.

ÓzA