Bıyılǵı jıldıń 10-dekabr kúni BMShtıń Nyu-Yorktaǵı bas rezidenciyasında qurallı kelispewshilikli aymaqlardan qaytarılǵan shaxslardı reabilitaciyalaw hám reintegraciyalaw máseleleri boyınsha Regionallıq ekspertler keńesiniń jumısına baǵıshlanǵan joqarı dárejedegi brifing shólkemlestirildi.

Ilaj SMTI hám Ózbekstannıń BMShtaǵı Turaqlı wákilxanası tárepinen BMSh Terrorizmge qarsı gúresiw basqarması hám BMShtıń Oraylıq Aziya ushın preventiv diplomatiya boyınsha regionallıq orayı járdeminde ótkerildi.
Brifingte BMSh Bas xatkeriniń orınbasarı Vladimir Voronkov, BMShtıń Oraylıq Aziya ushın preventiv diplomatiya boyınsha Regionallıq orayınıń basshısı Kaha Imnadze, BMSh Bas xatkeriniń járdemshisi Xaled Xiari, BMSh Kontrterror orayınıń direktorı Sauro Miediko, BMShtıń terrorizm boyınsha burınǵı arnawlı bayanatshısı, Minnesota universiteti (AQSh) professorı Fionnuala Ni Aolain, BMSh janındaǵı Xalıqaralıq Qızıl Yarım ay Komitetiniń (XQYaK) turaqlı baqlawshısı Leticiya Kurtua, sonday-aq, Oraylıq Aziya mámleketleri diplomatiyalıq missiyalarınıń basshıları shıǵıp sóyledi.
Ilaj BMShqa aǵza mámleketler wákillerinde úlken qızıǵıwshılıq oyattı. Brifingte Aziya, Afrika, Evropa, Arqa hám Latın Amerikasınıń 50 den artıq mámleketi, sonday-aq, 10 ǵa shamalas shólkem wákilleri qatnastı.
Reabilitaciya hám reintegraciya máseleleri boyınsha regionallıq ekspert keńesi 2024-jılı Ózbekstan Respublikası Prezidentiniń baslaması menen BMSh Terrorizmge qarsı gúresiw basqarmasınıń qáwenderliginde shólkemlestirilgen. Keńes Oraylıq Aziyanıń barlıq mámleketleriniń ekspertleri hám qánigelerin birlestirdi. Onıń platformasında reintegraciyalanǵan shaxslardıń normal hám tolıq ómirge tabıslı integraciyalasıwın támiyinleytuǵın bilimler, usıllar hám baǵdarlamalar jámlengen.
Ózbekstan birinshilerden bolıp óz puqaraların qurallı kelispewshilikli aymaqlardan repatriaciyaladı.
2019-jıldan berli 530 dan artıq Ózbekstan puqaraları, tiykarınan hayal-qızlar hám balalar Watanǵa qaytarıldı.Olarǵa medicinalıq, sociallıq hám ruwxıy járdem kórsetildi. Sonday-aq, kásip-ónerge oqıtıw hám jumısqa jaylastırıw boyınsha baǵdarlamalar islep shıǵıldı.
Dodalawlar dawamında BMSh Bas xatkeriniń Jaqın Shıǵıs hám Aziya-Tınısh okeanı regionı boyınsha járdemshisi Xaled Xiari Ózbekstan Respublikası Prezidentiniń regionallıq qáwipsizlikti támiyinlewge qosqan úlesi hám usı máselede alıp barılıp atırǵan siyasatınıń isenimliligi ushın minnetdarshılıq bildirdi. Sonıń menen birge Shavkat Mirziyoevtiń baslaması menen shólkemlestirilgen Regionallıq ekspertler keńesi ayrıqsha atap ótildi.
Keńestiń áhmiyeti haqqında sóz etiler eken, BMSh Terrorizmge qarsı gúresiw basqarmasınıń basshısı Vladimir Voronkov «Shólkem TQGB SMTI menen birgelikte Regionallıq ekspertler keńesi sekretariyatı wazıypasın atqarıp atırǵanınan quwanıshlı», – dep atap ótti.
Onıń sózlerine bola, búgingi dodalawlar Regionallıq ekspertler keńesi xalıqaralıq is-háreketlerdi baǵdarlaw orayı bolıp, qaytarılıp atırǵan shaxslardı reabilitaciyalaw hám reintegraciyalaw tarawındaǵı aldınǵı ámeliyat hám usıllarǵa úlgi bola alatuǵının tastıyıqlaydı.
Oraylıq Aziya ushın preventiv diplomatiya boyınsha Regionallıq oray basshısı Kaha Imnadzeniń atap ótkenindey, Oraylıq Aziya mámleketleri tájiriybesi basqa mámleketler ushın úlgi bola aladı. «Regionallıq ekspertler keńsei dúnyanıń basqa bólimlerinde da tákirarlanıwı múmkin bolǵan biytákirar baslama bolıp tabıladı. Men Oraylıq Aziyadaǵı birge islesiwshilerimizdi, BMSh hám regionallıq shólkemlerdi eń jaqsı sheshimlerdi tabıw ushın usı platformadan paydalanıwdı dawam etiwge shaqıraman», – dep qosımsha etti ol.
Rossiya hám AQShtıń BMShtaǵı elshileri de Keńes jumısın tolıq qollap-quwatlaytuǵının bildirdi. Oraylıq Aziya mámleketleri óz puqaraların kelispewshilikli aymaqlardan qaytarıw boyınsha sezilerli is-háreketlerdi ámelge asırǵanı siyasiy erk-ıqrar hám óz moynına alǵan minnetlemelerge sadıqlıq úlgisi ekenligi atap ótildi.

Dodalawlar juwmaǵında qatnasıwshılar Regionallıq ekspertler keńesi jumısı menen dúnya jámiyetshiligin tanıstırıw ámeliyatın dawam etiw zárúrligin awızbirshilik penen atap ótti. Usı tiykarda, BMShtıń tiykarǵı ilajlarınan biri – 2025-jılı iyun ayında Nyu-York qalasında ótkeriliwi rejelestirilgen Terrorizmge qarsı gúresiw boyınsha joqarı dárejedegi háptelik sheńberinde óz aldına sayd ivent ótkeriw atap ótildi.

Qaraqalpaqstan xabar agentligi