Bunday tártip tek ǵana mektep muǵallimlerine emes, al mektepke shekemgi bilimlendiriw shólkemlerinde jumıs islep atırǵan pedagog hám tárbiyashılarǵa da qollanıladı.
Sociallıq qorǵaw milliy agentligi hám Oliy Majlistiń Bala huqıqları boyınsha wákili (Balalar ombudsmanı)niń bilimlendiriw shólkemlerinde balalarǵa zorlıq jaǵdaylarına jol qoyǵan pedagog hám tárbiyashılardıń keleshekte balalar menen islesiwi boyınsha jumısın dawam ettiriw ushın belgili bir sheklewlerdi, qosımsha talaplardı názerde tutıw haqqındaǵı usınısı maqullandı.
Bul haqqında Prezidenttiń 2024-jıl 2- dekabrdegi «Balalar máseleleri boyınsha komissiyalar jumısınıń nátiyjeliligin arttırıw ilajları haqqında»ǵı PP-201-sanlı Pármanında názerde tutılǵan.
Pármanǵa bola, Ádillik ministrligi Oliy Majlistiń Bala huqıqları boyınsha wákili (Balalar ombudsmanı), Kámbaǵallıqtı qısqartıw hám bántlik ministrligi hám Mektepke shekemgi hám mektep bilimlendiriwi ministrligi menen birgelikte úsh ay múddette usı qaǵıydanı názerde tutıwshı normativlik-huqıqıy hújjet joybarın islep shıǵadı hám belgilengen tártipte Ministrler Kabinetine kirgizedi.
Párman Mektepke shekemgi hám mektep bilimlendiriwi ministrligi Joqarı bilimlendiriw ilim hám innovaciyalar ministrligi menen birgelikte bir ay múddette pedagoglrardıń tárbiyalanıwshılar, oqıwshı hám student-jaslar menen óz-ara baylanısların tártipke salıwshı barlıq hújjetlerdi zamanagóy talaplar tiykarında, sonıń ishinde, balalarǵa zorlıqtıń aldın alıw boyınsha tásirsheń mexanizmlerdi názerde tutqan halda tolıq qayta kórip shıǵadı.
Házirshe balalarǵa zorlıq jaǵdaylarına jol qoyǵan pedagog hám tárbiyashılardıń bilimlendiriw mákemesinde jumısın dawam ettiriwi ushın qanday sheklewler engiziletuǵını belgisiz.
Jańadan islep shıǵılatuǵın tártipte zorlıq jaǵdaylarına jol qoyǵan pedagoglardıń bilimlendiriw shólkeminde jumıs islew huqıqına emes, al basqa da huqıqlarına shek qoyılıwı múmkin. Bul haqqında tiyisli hújjet joybarı islep shıǵılǵanda bilip alıw múmkin boladı, -dep málimleme beredi xs.uz saytı.
Qaraqalpaqstan xabar agentligi