Qıytaq jer hár bir shańaraqtıń kúndelikli turmısı ushın paydalanıwda jaqsı imkaniyat bolıwı menen birge mol dáramat deregi esaplanadı. Jerdiń tilin bilip, jaratılǵan imkaniyatlardan orınlı paydalana bilgen máhálle turǵınları qıytaq jerleri arqalı ózleri kútken nátiyjelerge erspekte.
Taqıyatas rayonında da qıytaq jerlerden únemli paydalanıp atırǵan rayon turǵınları kópshilikti quraydı. Solardıń biri “Naymankól” awıl puqaralar jıyını turǵını Sharipbay Allambergenov. Ol bir neshe jıllardan berli úy qaptalındaǵı qıytaq jerdi egip, nál jetistirip kelmekte. Jerdiń tilin biletuǵın diyqannıń shańaraǵında xalıqtıń qıytaq jerlerinen únemli paydalanıwǵa qaratılǵan kórgizbeli ámeliy seminar shólkemlestirildi.
Onda báhárgi eginlerdi egiwge tayarlıq kóriw, sonıń menen birge, xalıqtı sapalı nálshe hám tuqım menen támiyinlew máseleleri sóz etilip, qatnasıwshılar qıytaq jer iyesi menen sáwbetlesip, onıń miynetiniń nátiyjelerin ámelde kórip tanıstı.
Seminar dawamında qánige tárepinen hár bir qarıs jerden ónimli paydalanıw, eginlerdi durıs tańlap egiw hám olarǵa jaqsı tárbiya beriw arqalı shańaraq dáramatın arttırıw boyınsha ámeliy usınıslar berildi.
Qaraqalpaqstan xabar agentligi