Bas ministrdiń orınbasarı – Shańaraq hám hayal-qızlar komitetiniń baslıǵı Zulayho Mahkamova basshılıǵında videoselektor májilisi bolıp ótti.
Onda Qaraqalpaqstan Respublikası, wálayatlar hám Tashkent qalası, sonday-aq, rayon hám qalalar dárejesindegi juwapker basshılar qatnastı. Mámleketimizde hayal-qızlardı qollap-quwatlaw, shańaraqlardı bekkemlew, hayal-qızlar hám balalardıń huqıqların qorǵaw baǵdarında ámelge asırılıp atırǵan jumıslar jáne gezektegi tiykarǵı wazıypalar hár tárepleme dodalandı.
Májilis aldında “Ózbekstan-2030” strategiyası hám 2026-jıl Mámleketlik baǵdarlamanıń orınlanıwı sheńberinde aymaqlarda alıp barılıp atırǵan jumıslar tallandı. Bul baǵdardaǵı jumıslar, erisilgen nátiyjeler, bar mashqalalar hám olardı saplastırıw ilajları boyınsha málimleme berildi.
Atap ótilgenindey, mámleketlik baǵdarlamalarda belgilengen maqset hám wazıypalardıń orınlanıwın tómengi buwınǵa shekem nátiyjeli jetkeriw, hár bir aymaq kesiminde anıq nátiyjelilikke erisiw búgingi kúnniń eń áhmiyetli talaplarınan biri bolıp esaplanadı.
Bunnan soń Ózbekstan Respublikası Prezidentiniń 2026-jıl 3-marttaǵı “Hayal-qızlar hám balalar huqıqlarınıń qorǵalıwın kúsheytiw jáne olarǵa bolǵan kúsh kórsetiw hám zorlıq jaǵdaylarınıń aldın alıw boyınsha qosımsha shólkemlestiriwshilik-huqıqıy ilajlar haqqında”ǵı pármanında belgilengen wazıypalardıń orınlanıwı dodalaw orayında boldı.
Atap aytqanda, erte hám nızamlı nekeni rásmiylestirmey turmıs qurıw jaǵdaylarınıń aldın alıw, nekeniń optimal jası – 21 jastıń abzallıqların xalıqshıl hám tásirsheń túrlerde keńnen úgit-násiyatlaw, nekeleniwshi jaslardı shańaraqlıq turmısqa puqta tayarlaw máselelerine ayrıqsha itibar qaratıldı.
Májiliste, sonday-aq, hayal-qızlar hám balalarǵa bolǵan kúsh kórsetiw hám zorlıqtıń aldın alıw, shańaraq hám hayal-qızlar mákemelerinde nekeleniwshilerdi “turmıslıq zorlıqsız baxıtlı shańaraqlıq turmısqa tayarlaw” arnawlı kurslarında biypul oqıtıw, kelispewshilikli shańaraqlar menen mánzilli islesiw, “Shańaraq profili” moduli jumısın jáne de jetilistiriw, kelispewshiliklerdi erte anıqlaw hám shańaraqtı turaqlastırıw arqalı shańaraqlıq ajırasıwlardıń aldın alıw baǵdarındaǵı jumıslar boyınsha aymaqlar kesimindegi ilajlar kórip shıǵıldı.
Bul baǵdarda sistemalı qatnastı kúsheytiw, kúndelikli qadaǵalawdı ámelge asırıw, máhállelerde kóshpeli qabıllawlar ótkeriwdi sistemalı jolǵa qoyıw jáne hár bir múrájat hám jaǵday menen individual islesiw zárúr ekenligi atap ótildi.
– Hár bir basshı óz aymaǵında hayal-qızlar hám shańaraqlar menen islesiwdi kúndelikli jumıstıń eń áhmiyetli ólshemi dep biliwi kerek, – dedi Bas ministrdiń orınbasarı – Shańaraq hám hayal-qızlar komitetiniń baslıǵı Z.Mahkamova. – Nátiyje bar jerde isenim, isenim bar jerde bolsa rawajlanıw boladı.
Kún tártibindegi gezektegi áhmiyetli másele hayal-qızlar arasında huqıqbuzarlıq hám jınayatshılıqtıń aldın alıw, atap aytqanda, jınayatshılıq kórsetkishi joqarı bolǵan 81 máhállede alıp barılıp atırǵan profilaktikalıq jumıslardıń tallawına baǵıshlandı.
“E-ijtimoiy profilaktika” sisteması menen islesiw, jas óspirim qızlardıń biydárek ketiwiniń aldın alıw, hayal-qızlar menen baylanıslı unamsız jaǵdaylardı erte anıqlaw hám saplastırıw baǵdarındaǵı ámeliy ilajlarǵa ayrıqsha itibar qaratıldı.
Juwapkerler tárepinen bul baǵdardaǵı jumıstı kúsheytiw, profilaktika nátiyjeliligin arttırıw hám aymaqlarda juwapkershilikti bunnan bılay da bekkemlew boyınsha usınıslar bildirildi.
Májilis dawamında Ózbekstan Respublikası Prezidentiniń 8-mart – Xalıqaralıq hayal-qızlar kúnine baǵıshlanǵan saltanatlı máresimdegi múrájatınıń mazmun-mánisin hám áhmiyetin úgit-násiyatlaw, onnan kelip shıǵatuǵın tiykarǵı wazıypalardıń hár bir máhállede tolıq kólemde orınlanıwın shólkemlestiriw boyınsha tiyisli ilajlar belgilendi.
Atap aytqanda, hayal-qızlardıń jámiyettegi ornı hám abırayın bunnan bılay da arttırıw, olardıń huqıqları menen máplerin támiyinlew, bántligin qollap-quwatlaw, densawlıǵın bekkemlew, ilim, bilimlendiriw, isbilermenlik hám basqarıwdaǵı belsendiligin keńeytiw boyınsha aldaǵı wazıypalar belgilep alındı.
Sonday-aq, májiliste jaqınlasıp kiyatırǵan Ramazan hayıtı hám Nawrız áyyyamın múnásip belgilew, respublikamız boylap shólkemlestiriletuǵın ulıwmaxalıqlıq shembiliklerde belsene qatnasıw, aymaqlarda abadanlastırıw hám kóklemzarlastırıw jumısların izbe-iz dawam ettiriw, jańa náller egiw jáne “Hayal-qızlar baǵı”n shólkemlestiriw máseleleri kórip shıǵıldı.
Bul baǵdardaǵı jumıslardı máhálleler, bilimlendiriw mákemeleri, miynet jámáátleri hám keń jámiyetshiliktiń qatnasıwında shólkemlesken halda shólkemlestiriw zárúr ekenligi atap ótildi.
Májilis juwmaǵında barlıq juwapkerlerge belgilengen tapsırmalardıń orınlanıwın sózsiz támiyinlew, hár bir aymaqta mánzilli, sistemalı hám nátiyjeli jumıslardı jolǵa qoyıw, hayal-qızlar hám balalardıń huqıqları menen máplerin qorǵaw, shańaraqlarda salamat ruwxıy ortalıqtı bekkemlew jáne orınlarda ámeliy nátiyje beretuǵın baslamalardı keńeytiw boyınsha anıq kórsetpeler berildi.
N.Usmonova, ÓzA