DMO Karakalpakstan jámiyetlik birlespesinde Yaponiyadan kelgen xalıqaralıq ekspertler – Japan Business Skills Development shólkeminiń direktorı Tomixiko Sato hám Isbilermenlik boyınsha bilimlendiriw hám izertlew orayınıń direktorı, professor Onodera Tadasi menen ushırasıw bolıp ótti.
Ushırasıw dawamında DMO Karakalpakstan direktorı M.Kosnazarov Qaraqalpaqstan Respublikası, onıń infrastrukturası, bay tariyxıy-mádeniy miyrası, gastronomiyalıq turizmi, sonday-aq, regionnıń keń turistlik potencialı haqqında maǵlıwmat berdi.
Miymanlarǵa GIZ (Germaniya xalıqaralıq birge islesiw jámiyeti) hám DMO Karakalpakstan qospa joybarı sheńberinde regionnıń turizm infrastrukturasın rawajlandırıw, turizm xızmetleriniń sapasın arttırıw hám Qaraqalpaqstannıń turizm potencialın xalıqaralıq kólemde úgit-násiyatlaw boyınsha burın ámelge asırılǵan ilajlardıń nátiyjeleri tanıstırıldı.
Sonday-aq, Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondınıń sociallıq buyırtpası tiykarında ámelge asırılıp atırǵan “QR Gastronomic Quality: Qaraqalpaqstannıń tartımlılıǵın arttırıw ushın turizm xızmetleriniń gastronomiyalıq sapasın bahalaw hám jaqsılaw” joybarınıń prezentaciyası da ótkerildi.
Bunnan tısqarı, ushırasıw dawamında tárepler mámleketler arasında turizm tarawında baylanıslardı jolǵa qoyıw, Yaponiya menen turistlik baǵdarlardı rawajlandırıw hám CBT turizmi boyınsha tájiriybe almasıw imkaniyatların dodaladı.
Qaraqalpaqstan xabar agentligi