Nókis qalasında sporttıń voleybol túrinen 17 jastaǵı qızlar arasında Ózbekstan chempionatı bolıp ótti.
CHempionatqa elimizdiń barlıq aymaqlarınan komandalar qatnasıp, jeńimpazlıq ushın óz-ara bellesti.
Qızǵın ótken bellesiwler sońında Azat Kazakov basshılıǵındaǵı respublikamız saylandı komandası birinshi orındı iyelep, Ózbekstan chempionı ataǵına miyasar boldı.
Al, sıylı ekinshi hám úshinshi orınlar Surxandárya hám Namangan wálayatı komandalarına nesip etti.
Sportshılardı sıylıqlaw máresimine Ózbekstan Milliy Olimpiada komiteti Qaraqalpaqstan bólimi atqarıwshı direktorı Sh.Aytbaev, Qaraqalpaqstan Respublikası Sport ministri E.Qutıbaev, Qaraqalpaqstan Respublikası Ishki isler ministr orınbasarı G.Eshimbetov hám bir qansha juwapkerler qatnasıp, jeńimpaz komandalardı qutlıqladı hám olardıń aldaǵı jarıslarına da tabıslar tiledi.
Jarıs juwmaǵında jeńimpazlar shólkemlestiriwshiler tárepinen tayarlanǵan medal hám estelik sawǵaları menen sıylıqlandı.
Qaraqalpaqstan xabar agentligi