Qaraqalpaqstan Respublikası tutınıwshılardıń huqıqların qorǵaw jámiyetleri federaciyasınıń isenim telefonına Buxara wálayatında jasawshı puqara C.G. tárepinen awızsha arza kelip túsken. Oǵan bola, puqara sociallıq tarmaqta kórgen reklama boyınsha dúkánǵa baylanısıp, bahası 2 million 400 mıń sumlıq shóp maydalaǵısh úskenesine buyırtpa bergen. Biraq buyırtpa qabıl etilip, Buxara wálayatına jetkerip berilgeninen bir neshe kún ótkennen soń úskene islemey qalǵan.
Bul másele boyınsha puqara sawda qánigelerine xabar bergen. Biraq unamlı juwap almaǵanlıǵı sebepli, usı úskene ushın tólengen pul qarjısın qaytarıp alıw maqsetinde jámiyetke múrájat etken.
Bul múrájat boyınsha Tórtkúl rayonı tutınıwshılardıń huqıqların qorǵaw jámiyetiniń qánigeleri rayondaǵı sawda dúkánı baslıǵı hám xızmetkerleri menen baylanısıp, múrájat boyınsha úyreniw jumısların alıp bardı. Alıp barılǵan túsindiriw jumıslarınan soń tutınıwshınıń 2 million 400 mıń sum pulı qaytarıp beriliwine erisildi.
Qaraqalpaqstan xabar agentligi