Teńizdiń qurıǵan aymaqlarında jasıl ósimlik qaplamasın jaratıw, shólge aylanǵan maydanlardı tiklew hám qorshaǵan ortalıqqa unamsız tásirlerdi azaytıw maqset etilgen.
Baslama tek ǵana aymaqtıń ekologiyalıq turaqlılıǵın támiyinlew emes, al samal arqalı kóteriletuǵın duz hám shań boranların azaytıw, topıraq ónimdarlıǵın tiklew hám jergilikli biokóptúrlilikti qayta janlandırıwǵa xızmet etedi. Jasıl qaplama jaratıw arqalı qurıǵan teńiz túbinde jańa ósimlikler egilip, waqıt ótiwi menen tábiyǵıy ekosistemanı tiklew ushın tiykar jaratıladı.
Ájiniyaz atındaǵı Nókis mámleketlik pedagogikalıq institutı Tábiyǵıy pánler fakulteti student-jasları da tiyisli juwapkerler hám professor-oqıtıwshılar menen birgelikte Aral teńiziniń qurıǵan ultanında ekologiyalıq turaqlılıqtı tiklewge qaratılǵan ekoakciyada belsene qatnastı.
Ekoakciya dawamında teńizdiń qurıǵan ultanına shól klimatına shıdamlı seksewil hám basqa da ósimlik nálleri egildi.
– Bunday ósimlikler aymaqta qum kóshiwiniń aldın alıw, hawaǵa kóterilip atırǵan duz hám shań muǵdarın azaytıw, sonday-aq, ekologiyalıq turaqlılıqtı támiyinlewde úlken áhmiyetke iye. Student-jaslarımız tábiyattı qásterlep saqlaw, qorshaǵan ortalıqqa juwapkershilik penen qatnas jasaw boyınsha ózleriniń puqaralıq poziciyasın kórsetip, akciyada ayrıqsha belsendilik kórsetti, – deydi Tábiyǵıy pánler fakultetiniń dekanı Q.Reymov.
Mámleketimizde Aralboyı aymaǵındaǵı ekologiyalıq jaǵdaydı jaqsılaw boyınsha keń kólemli jumıslar ámelge asırılıp atırǵanlıǵın atap ótiw kerek. Prezidentimizdiń baslaması menen Aral teńiziniń qurıǵan ultanında millionlaǵan gektar maydanlarda seksewil hám basqa da shólge shıdamlı ósimlikler egiw jumısları alıp barılmaqta. Bunday jumıslardıń nátiyjesinde aymaqta “jasıl qaplama”nı keńeytiw, qum hám duzlardıń kóteriliwiniń aldın alıw, sonday-aq, xalıqtıń salamatlıǵın qorǵawǵa qaratılǵan áhmiyetli nátiyjelerge erisilmekte.
Qánigelerdiń pikirinshe, bunday ekologiyalıq joybarlar keleshekte aymaqtıń ıqlımın jumsartıwǵa, xalıqtıń salamatlıǵın qorǵawǵa hám tábiyǵıy resurslardan turaqlı paydalanıwǵa da úlken úles qosadı.

Qaraqalpaqstan xabar agentligi