Sanlı texnologiyalar ministrliginde Yaponiyanıń iri sawda korporaciyalarınan biri – “Itochu Corporation” wákilleri menen ushırasıw ótkerildi. Onda mámleketimizdiń MT bazarına investiciyalardı tartıw hám óz-ara birge islesiwdi keńeytiw máseleleri kórip shıǵıldı.
Sóylesiw dawamında kompaniyanıń Ózbekstanda aviaciya sanaatına baylanıslı BPO hám KPO xızmetlerin IT Park rezidenti sıpatında ámelge asırıw imkaniyatları boyınsha sóylesiwler alıp barıldı.
Sonday-aq, sırt el kompaniyaları ushın elimizde “One Stop Shop” principi tiykarında qolaylı sharayatlar jaratılǵanı, atap aytqanda, kárxanalardı dizimnen ótkeriw, ofis hám maman kadrlar tabıwda tikkeley járdem kórsetilip atırǵanı atap ótildi.
Itibarlı tárepi, búgingi kúnde IT Parktiń 3500 den aslam rezidentinen derlik 1000 ı sırt el kapitalı tiykarında jumıs alıp barmaqta. Sońǵı bir jıl ishinde 27 Yaponiya kompaniyası usı statustı alǵan.
Ushırasıwda Yaponiyadaǵı MT kadrlar jetispewshiligin qaplaw maqsetinde Ózbekstan jasların tayarlaw boyınsha qol qoyılǵan túsinisiw memorandumı (MoU) ayrıqsha áhmietke ie ekeni, ulıwma alǵanda Yaponiya elimiz ushın strategiyalıq sherik ekeni atap ótildi.
Sonday-aq, Qaraqalpaqstan Respublikasında Data – oraylar hám AI joybarları ushın jaratılǵan arnawlı jeńillikler haqqında maǵlıwmatlar berilip, investorlar qatarında yapon kompaniyaları da mirát etildi.
Juwmaǵında “Itochu Corporation” wákilleri mámleketimizdegi ashıq biznes ortalıǵın unamlı bahalap, keleshekte ámelge asırılatuǵın mámleketlik-jeke menshik sheriklik (PPP) joybarları sheńberinde ministrlik hám IT Park penen birge islesiwge tayar ekenligin málim etti.

Nigora Rahmonova, ÓzA